Misissuinerup ingerlanerani atuartut paasivaat, Kangerlussuarmi eqqaavissuarmut akisussaaffimmik namminersorlutik oqartussani tiguserusuttoqanngitsoq innersuussutigalugu, kommunip akisussaaffigineqarnera isumaqqarlutik. Kommunimullu saaffiginnikkamik paasitinneqartarput, namminersorlutik oqartussat akisussaaffigigaat, namminersornerullutillu oqartussat Kangerlussuaq 2002-mi tigummaguli akisussaaffigilernikuullugu. Tamanna Sisimiuni sumiiffimmi aviiseeqqami nunalu tamakkerlugu saqqummertartuni aviisini nassiunneqartumik isornartorsiuummik atuartut allaaserinninnissaannik pilersitsivoq.
”Sammisaqarluni sapaatip akunneqartitsineq Nunarsuaq pisullu imminut qanoq ataqatigiinnerat pillugu atuartut annertunerusumik ilisimasaqalernerat nuannerpoq. Aamma pitsaalluinarpoq ilisimalikkat nutaat matumani pisutut iliuuseqalersitsimmata, tassani ilinniartut namminneerlutik namminersorlutik oqartussani kommuninilu akisussaasuusunik misissuinikuullutik inunnillu apersuinikuullutik. Tamatumalu malitsigisaanik ilisimaligartik tunuliaqutaralugu ilanngutassiillutik, Qinnguata atuarfiani atuarfiup aqutsisua Jens B. Scharnberg oqarpoq. Nangipporlu: ”uagut atuartut isumassarsianik nutaanik pilersitsinissamut ajornakusoortitsisunik atuartoqarpugut. Sapaatilli akunnerini makkunani atuartut isumassarsianik pissarsinissaanik tamaviaartinneqarput. Ilikkagaqarnerlu taanna siumut sammisumik soorlu assersuutigalugu qallunaatut kalaallisullu allattariarsornerni atorneqarsinnaavoq. Taannaavorlu misilikattanik pigilikkatsinni pingaarnerpaaq "Jens B. Scharnberg naggasiivoq.
Nunaqarfimmi allami Atammimmi sammisaqartitsilluni sapaatip akunneqartitsineq aammattaaq allaanerusumik sulisinnaanermut inuit ilaannut aammaassivoq, atuartut atuartunik tamanik akuutitsinissaannut tunngatillugu ingerlalluartumik. ”Atuartuutitta amerlanersaat isumassarsiullaqqissorujussuupput namminnerlu assatik atorlugit sulinermikkut atorsinnaasunillu pilersitsinissamut periarfissinneqaraangamik eqeertarlutik". Atammimmi atuarfiup aqutsisua Juliane Fleischer oqarpoq nangillunilu "Nunaqarfinni akimortumik suleqatigiinnissamut pikkoriffeqareerpugut, periutsinilli taakkunannga nutaanik sulinissamut atuartut pikkorinnikorujussuupput. Taamaattorli aatsaavissuaq Atammimmi sapaatip akunnerini marlunni sammisaqarnikuuvugut aammalu atuartunut ilinniartitsisunullu ingerlaneq ilinniutaanikuuvoq. Qularinngilluinnarparali periutsit ulluinnarni sulinitsinni atorumaarigut, atuartut akuutinnissaannut pitsaasuugamik aammalu atuartut atuartinnissaanut siammasissumik eqquigamik" Juliane Fleischer naggasiivoq.
Sapaatit akunnerini suliaqarneq Nunarsuaq tamakkerlugu angunuakkanut iliuuseqarnermik taaneqartoq, suliffeqarfimmit '&LEARNING'-imit pilersitaavoq, kommunillu ataatsiomoorlutik meeqqat atuarfiinik kivitsinissamut Kivitsisa-mut ilaasuulluni. Kommunit ataatsimoorussamik meeqqat atuarfiinik kivitsiniarnerat pillugu annertunerusumik uani atuaruk https://kivitsisa gl/
Nunarsuaq tamakkerlugu angunuakkanut iliuuseqarneq pilersitsisumik atuartitsinermik ingerlatsinermik tunngassuteqartoq, FN-ip Nunarsuarmut anguniagaanik ukkataqartuusoq, atuarfinni aqutsisut atuarfinnilu ilinniartitsisut qanimut suleqatigalugit ineriartortinneqarpoq. Annertunerusumik uani takuuk: https://aktionverdensmaal.net/nunarsuaq-tamakkerlugu-anguniakkanut-iliuuseqarneq/
Maajimi/juunimi ilinniartitsisut siulliit, ikorfartortitut aamma taagorneqartut, pikorissartinneqarput. Tamatuma kingorna ikorfartortit klassini ataasiakkaani misileraalluni ingerlatsinernik siullernik suliaqarput. Septembarimi Qeqqata Kommuniani atuartunit tamanit peqataaffigineqartumik workshoppertitsisoqarpoq, tassani periutsinik ilisimasaqalersinneqarput, taamatullu sapaatit akunnerini suliaqarnissamut, ikorfartortinit suliarineqarsimasunik atuartitsinissamut pilersaarutinik tunineqarlutik. Ukiuni tulliuttuni sammisaqartitsisarneq uteqqiattuunissaa pilersaarutaavoq, taannalu Qeqqata Kommuniani atuartunik pilersitsisinnaasunik, suliamik ilisimasaqarluartunik nunarsuarmioqataalluartunik pilersitsisussaassalluni.
