Atuartitsissutini pitsaasunik angusaqarfiusut ilagaat tuluttut, nuna tamakkerlugu allattariarsornikkut oqaluttariarsornikkullu tuluttut soraarummeerluni misilitsinnerni Qeqqata Kommunia pitsaanerpaanik angusaqartuuvoq. Sermersooq pitsaanerpaatut inissisimasarnikuuvoq. Qeqqata Kommuniani ukioq atuarfiusumi 2018/2019-imi soraarummerrnermi misilitsinnerit nalinginnaasumik kusanartuupput, siulianilu tuluttut angusat eqqaaneqartut saniatigut, suliniuteqarnermi kiisalu matematikkimi allattariasornikkut angusat pitsaasuupput, nuna tamakkerlugu agguaqatigiisitsinermi qaffasinnerpaatut inissisimalluta.
Nikeriarfinni misilitsinnerni, 3 klassimi 7 klassimilu ingerlanneqartartuni, inernerit qiviaraanni, kommunimi angusat aamma pitsaasuupput. 3 klassimi nuna tamakkerlugu tuluttut pitsaanerpaat tulliatut inissisimavugut, qallunaatullu pitsaanerpaatut inissisimalluta, Sermersooq siusinnerusukkut pitsaanerpaatut inissisimasarnikuulluni. Matematikkimi pitsaanerpaaq marluullutigu inissisimavugut. Kalaallit "pitsaannginnerpaatut" inissisimaffigisartakkatsinni, avannaani kommuninut, kalaallisut pitsaalluinnartumik inissisimasartunit tulliulluta "pingajuattut" inissisimavugut.
Suunuku taamak pitsaatigisumik inissisimalersimanermut patsisaasut? Inernerit pitsaasunut Qeqqata Kommuniani oqaatsinut atuartitsissutinut, 2015-imi akunnernik agguaassinissamut pilersaaruteqarnermut atatillugu qallunaatut tuluttullu akunnerit amerlineqarnerinut ataqatigiipput. Tamanna ilaatigut Kalaallit Nunaanni kommuni siullersaalluni 1 klassimit tuluttut atuartitsisalernermik kinguneqarpoq.
Kommunimi iPad-imik suliniuteqarnikkut digitaliseriinermik ukkataqarnerput, inernernut pitsaasunut ataqatigiinnera takuneqarsinnaavoq. Ilinniartitsisut atuartullu tamarmik iPad-tsimik tunineqarneratigut, atuartunut atuartitsineq kajumitsitsivoq, atuartunullu ataasiakkaanut atuartitsissummik naleqqussaanissamik pisariinnerulersitsilluni. Tamatuma saniatigut iPad-tsip atuutilersinnerata kinguneraa, atuartut attaveqaqatigiinnissamut paasissutissanillu katersinissamut pikkorinnerulersimanerat. Tamakku ataatsimoortillugit qallunaatut, tuluttut matematikkimilu, pingaartumillu projektiliornermi inernerisigut takuneqarsinnaapput.
”Inernerit akunnernik agguataarinissamut pilersaarutip kiisalu meeqqat atuarfii pillugit oqaatsitigut iPad-tsimillu suliniuteqarnikkut kommunip ukkataqarsimanerata ataqatigiittoqarnera takullugu nuannerpoq, tamatumami takutiinnarpaa eqqortumik ukkataqarsimanerput” Taamak Ilinniartitaanermut ataatsimiititaliami siulittaasoq Evelyn Frederiksen oqaaseqarpoq.
2018-imili ukiunullu tulliuttunut Oqaatsit Nunarsuarmiooqataanngorsaaneq, suliniuteqarfiusut allat pingasut ilanngullugit, tassaasut: Atuarfimmik imminnullu ataqqinninneq, atuarfiup angerlarsimaffiullu suleqatigiinnerinik nukittorsaaneq kiisalu Atuartitsinerup inerisarneqarnera, iPad-tsimik suliniuteqarnikkut ingerlanneqartumik, maannakkullu nuna tamakkerlugu meeqqat atuarfiini suliniummut Kivitsisa-mik taaguuteqartumut ilaalersimasuusumik ukkatarinninnini ingerlatiinnassavaa.
”Suliniutit ingerlateriikkagut siunissami pitsaasunik inernernik kinguneqarumaartut neriuutigaarput. Tamatuma saniatigut ataatsimiititaliaq allaffeqarfillu sinnerlugit, atuarfinni aqutsisunut ilinniartitsisunullu sulilluarsimanerinut qujarusuppunga. Tamatuma saniatigut atuartunut angajoqqaanullu qujarusuppunga, taakkuummatamani atuarfimmi atuarfimmullu soqutiginninnermikkut angusat pitsaasuunerinut peqataanikuusut. Aammalu siunissami atuarfiup angerlarsimaffillu suleqatigiinnerisa nukittorsarnissaanik aammalu siunissami angusat pitsaasuuginnarnissaasa qulakkeerneqarnissaat neriuutigalugu tamassi juullisiorluarnissassinnik kissaappassi” taamak Evelyn Fredriksen naggasiivoq.