Leana Jensen Berthelsenimik ateqarpunga 17-nillu ukioqarlunga.
Maannakkut Canadami, Vancouverimi EF aqqutigalugu atuarpunga.
Atuarnera aallarteqqaarakku assut sakkortunikuuvoq annikilliornarlunilu, nunaqqateqarani ilaquttat qimallugit aallartilluni. Atuarnera aallartikkakku inuit 400-t sinnerlugit nunanit assigiinngitsorpassuarneersut aallarteqatigaakka, nukarlersallu ilaanneeriarama assut ernumanikuuvunga qanoq ingerlajumaarnerlunga, tamattalu piginnaasagut assigiinngikkaluartut assigiimmik aallartikkatta ilinniarusulluta assut nuanninaarpara.
Vancouver
Vancouver assut nuannareqaara allamiorpassuarnik najugaqarfigineqarami nunarsuarmioqataasutut misiginartorujussuuvoq. USA-mut qanittuararsuuvugut Illoqarfinniit Seattlemut biilinik nalunaaquttap akunneri pingasut inorlugit angalariaannaalluta aammalu nunarsuarmi tusaamaneqarluartumi sisoraartarfissuarmut Whistlerimut qanitsuaraalluta.
Illoqarfigisara illoqarfissuugaluartoq qaqqaqarnera immamullu qaninnera assut iluarpoq.
Angajoqqaarsiaqarneq
Ilaqutariinniik Iranimeersunik aallaqqaammut angajoqqaarsiaqarpunga, qaammatillu iluani nuuttariaqalerama nuunnikuuvunga, ilaqutariinni Filippinerineersuni najugaqalerlunga, taamaasillunga aamma kulturinik arlalinnik ilisimasaqalerpunga.
Atuarfik pissanganartoq
Atuarfiga assut nuannareqaara pissarsiaqarnartorujussuummat, tuluttullu assut piginnaasaqarneruleqaanga. Sapaatit akunneri arfinilikkaarlugit misilitsittarpugut paasiniarlugu piginnaasagut qaffassimanersut.
Atuarfipput ullut tamaasa sammisassaqartitsisarpoq takornariagassanullu aaqqissuussiuaannarluni, atuareernerup kingorna weekendinilu peqataaffigisinnaasatsinnik.
Inuit naapitat nuannersut
Angalanerup nuannequtiginerpaasaata ilaagaat naapitassarinngisaannagaluakkanik ikinngutitaartorluni sumiiffinniit allarujussuarniit. Inuit namminermiik allaanerujussuit ikinngutigilerlugit aamma ilinniutaaqaaq isiginnittariaatsimut allannguutaasorujussuuvoq.
Angalanera assut inuttut nukittorsaatigeqaara sungiusimasaq qimallugu nutaamukarluni, assigiinngitsorpassuartigut ilinniutaavoq nukittorsaataallunilu.
Atuarfigisara agguaqatigiisillugu 18-23 ukiulinnik atuartoqarpoq, 16-64-it angullugit ukiullit atuarlutik. Taamaammat inuusuttunuinnaanngilaq atuarfigisara kikkulluunnit peqataaffigisinnaavaat.
Tuluit Nunaannut atuariartornissaq
Ukioq affaq Vancouverimeereeruma atuarnera Tuluit Nuaannut nangikkiartussavara, taakaniissallungalu qaammatit pingasut. Assut nuannerunartippara nunani assigiinngitsuni misigisassarsiornissara.
Nunarsuaq takusassaqaqaaq taamatut angalanissaq assut innersuukkusuppara misigisassaavoq peqqissimissutissaanngitsoq iluaqutilerujussuarlu.
Neriuppunga periarfissaq atorluarneqarumaartoq, allammi aamma taamatut misigisaqartikkusunnaqaat.
Illit aamma EF aqqutigalugu angalasinnaavutit
8.- 9. klassimi atuartunut aasaanerani atuanngiffiup nalaani oqaatsinik ilinniarniarluni (tuluttut) piffissami sivinikinnerusumi nunani allaniinnissamut tapiiffigineqarsinnaaneq Qeqqata Kommuniata neqeroorutigivaa.Aasaanerani atuanngiffiup nalaani ingerlanneqartussanut, oqaatsinik ilinniarfinnut tapiisinnaaneq pillugu ilinniartut ataasiakkaat qinnuteqarsinnaapput. Tassaasinnaapput STS, EF imaluunniit neqerooruteqartunit allaneersut. Qinnuteqartut akornanni atuartut marluk-pingasut toqqarneqassapput.
Qinnuteqarnermut killiliussaq: Ataasinngorneq 17. februaari 2020 atuarfigisap pisortaanut nassiunneqassapput.Kommunip nittartagaani atuaruk: https://bit.ly/31GXILz