Meeqqat meeqqat atuarfianni peqataaniarnermigut ajornartorsiuteqaleraangata ilaqutariit klassiannut innersuunneqartarput. Tassani angajoqqaat peqataatinneratigut atuartup atuagarsornikkut inooqataanikkullu ilorrisimaarnissaa, pitsanngorsarnissaa piginnaaneqalernissaalu anguniarneqartarpoq.
Paninnguaq Johnsen erneralu ilaqutariit klassianni atuartinneqarsimapput.
- Ernera piffissaq eqqorlugu amerlanertigut atuariassaarami. Taavalu klassip iluani malinnaasinnaanera killeqalerluni, tamannalu atuaqataanut sunniuteqartarmat. Tamanna pillugu ilaqutariit klassianni atuartarnikuuvugut, Paninnguaq Johnsen oqaluttuarpoq.
Ilaqutariinnut klassi iluaqutitalik
Ilaqutariit klassiat ilaqutariinnut, atuaqatigiinnut minnerunngitsumillu meeqqamut iluaqutaasartoq, ilinniartitsisup, Astrid Jensenip misilittagaqarfigaa.
- Meerarpassuaqarpoq inooqataanikkut ikorfartugassanik. Angajoqqaallu peqatigalugit maaniinnerminni eqeersitaasutut ittutullusooq pisarput, ilaqutariit klassianni ilinniartitsisoq, Astrid Jensen oqarpoq.
Ilaqutariit sapaatip akunneri arfinillit iluanni aqqaneq marloriarlutik ilaqutariit klassianni atuartinneqartarput. Atuartinneqarnerlu naammassimmat Paninnguup erneranut assut malunnaatilimmik iluaqutaavoq.
- Massakkut piffissaq eqqorlugu sioqqulluguluunniit atuariartortalernikuuvoq, atuarnerminilu malinnaanerulernikuulluni. Ilinniartitsisoq sianikulajunnaarnikuuvoq oqaluuttariaqarneranik.
Atuarfimmuinnarli kisimi iluaqutaanngilaq, inooqataanermut, ilaqutariinnullu iluaqutaasoq Paninnguaq Johnsenip oqaluttuaraa. Ernerammi akisussaassusermik takutitsisinnaalersimavoq.
- Angerlarsimaffimmi akisussaaqataanerulerpoq. Piumassuseqarnerulerpoq suliassat tungaatigut. Taava aamma uanga anaanatut tusarnaanerulerpunga. Iliuuseqarnissaanullu utaqqisinnaanerulerlunga. Meeqqap pisariaqartitani pinerulerpaa piffissaqarfigineqarnerulerluni, Paninnguaq Johnsen oqaluttuarpoq.
Peqataanngitsut amerlasut
Qeqqata Kommuniani ukiumi atuarfiusumi 2018-2019-inimi ilaqutariit 38-it ilaqutariit klassiannut innersuunneqarput. Innersuunneqartuni ilaqutariit 24-it peqataarusussimanngilat unitsitsiinnarsimallutilluunniit. Peqataasinnaannginnermut suliffik ilaatigut aporfigineqartarpoq.
Inatsisartut inatsisaanni allaqqavoq meeqqat atuartitaasussaatitaanerat eqquutsinnissaa angajoqqaat akisussaaffigigaat, atuartitaasussaatitaanerannullu akornusersuisussaanatik.
Paninnguaq Johnsenip ilaqutariit klassiat ilaqutariinnut innersuukkusuppaa, angajoqqaallu innersuunneqarsimasut peqataanissaannik kajumissaarlugit.
- Iluaqutaasorujussuuvoq, angerlarsimaffitsinni aamma ataqqinninnerulerluni pigami. Ilaqutariit innersuunneqarsimasut peqataatikkusunnarput, iluaqutissartaqarput tamarmik. Peqqissiminanngilaq.
Meeqqat atuarfianni ilaqutariit klassii Qeqqata Kommuniani ukiumi atuarfiusumi 2016-2017-inimi pilersinneqarput. 2019-illu tungaanut ilaqutariit 72-it atuartinneqarlutik naammassinnipput.
