Pisortat illuutaat inuinnaallu angerlarsimafii tamarmik tamanut tikikkuminartuussapput, aamma innarluutilinnut. Innarluutillit innuttaasut allat assigalugit paasissutissanik pissarsisinnaatitaassapput. Innarluuteqaraanni innarluuteqanngikkaluaraanniluunniit ilinniarnissamut periarfissaqassaaq. Ilinniakkat inuup innarluutillip ataasiakkaap pisariaqartitai piginnaasaalu malillugit aaqqissuunneqassapput. Tamakkuupput ilaatigut innarluutilinnut politikkissami nutaami sammineqartut ilaat.
2020-2023-mut politikki nutaaq
Qeqqata Kommuniata innarluutilinnut politikkia kingullermik 2009-mi suliarineqarpoq, taamanermiillu innarluutilinnut atugassarititaasut allanngornikooqaat. Taamaattumillu kommunip immikkoortumut takorluugai anguniagaalu isumaliuutigineqaqqipput nutarsarneqarlutillu, innarluutilinnullu politikkimut nutaamut katersorneqarlutik. Siunissami innarluutilinnut politikki minnerpaamik ukiut sisamakkaarlugit nutarterneqartassaaq, innarluutilinnullu politikki una ukiunut 2020-2023-mut atuutissaaq.
Sapaatip akunneri sisamat tusarniaassutigineqarpoq
Qeqqata Kommuniani suleqatigiissitat assigiinngitsut innarluutininnut politikkissat ukiup affaani suliaraat. Naatsorsuutigineqarporlu apriilip qaammataata naalernerani kommunalbestyrelsip ataatsimiinnerani akuersissutigineqarumaartoq.
Innarluutilinnut politikkissaq sapaatip akunnerani sisamani tulliuttuni tusarniutigineqassaaq. Tusarniummut akissutit apeqqutillu Johanne Bladt Vammenimut nassiunneqassapput uunga mailimut jova@qeqqata.gl . Innarluutilinnut politikkissaq kommunip nittartagaani aamma atuarneqarsinnaavoq, kiisalu kommunimi Sisimiuni Maniitsumilu innuttaasunut sullissiviup saaffiginnittarfiani aamma pissarsiarineqarsinnaalluni. Innarluutilinnut politikkissaq attuumassuteqartunit, kikkunnillu tamanit oqaaseqarfigineqarlunilu isummarsorfigineqarsinnaavoq.
Innarluutilinnut politikkissaq tusarniutigineqartoq uani atuarneqarsinnaavoq: Innarluutilinnut politikki 2020-2023
