Nunatsinni meeqqat atuarfii tamarmik matugallarput, coronavirusip tuniluutinnginnissaa anguniarneqarmat. Naak meeqqat atuarfii matoqqagallaraluartut, meeraq angerlarsimaffimmini atuarfimmi suliassat ilinniagassallu suliarisussaavaat.
Atuarfimmi siunnersortip meeqqat sooq atuarfimmiit angerlarsimaannassanerannut soorlu inunnut akuussannginnerannut angajoqqaat nassuiaanissartik akisussaaffigaat.
- Tuniluutinnginnissaa siunertaagami ullut 14-it angerlarsimassapput. Pingaarnerpaavoq illup iluani eqeersimaaqatigiinnissaq peqatigiinnissarlu. Meeqqap oqaloqatigilluarnissaa pingaartorujussuuvoq. Imatut qulaaninngaanniit oqaluutiinnaqinagit, kisianni paasitillugit. Paaseqatigiinneq taanna annertuumik pingaaruteqassaaq. Meeqqap paasilluartariaqarpaa suna peqqutaanersoq angerlarsimanerminnut. Meeqqat paasilluanngikkunikku suna pissutigalugu taamaattoqarnersoq. Taava nammineq isumartik atuunnarlugu ingerlalersinnaapput. Taavalu immaqa killeqanngitsumik aniilersinnaallutik. Pingaartupilussuuvoq meeraq oqaloqatigalugu killissaa tikillugu paasitinnissaata tungaanut angajoqqaat paasititsiniaallutik, Minngortuunnguup Atuarfiani siunnersorti Pilunnguaq Petersen oqarpoq.
Meeqqallu sinilluartarnissaa pingaaruteqarpoq, atuarnerup tungaatigut ilikkagaqarluassaguni.
- Meeqqat sinilluarsimagaangamik ulluinnarni atuaraangamik sulilluarnerusarput ilikkagaqarluarnerusarlutillu. Neriuppugut meeqqat innajaartarnertik attatiinnassagaat.
Meeqqat atuarfiisa matugallarnerannut ilinniartitsisut meeqqap angerlarsimaffimmini atuarnissaanut atatillugu pilersaarusiortussaapput, pilersaarusiorsimanngippatalu:
- Ilinniartitsisup siunnersuuteqarluni skemaliuussimanngippagit, kissaatiginarpoq angajoqqaat meeqqatillu oqaloqatigiissasut. Oqaloqatigiinnermi tassani skemaliorneq eqqartorneqarluni. Sapaatip akunnerata ingerlanerani qanoq ingerlassanerlutik allattorsinnaavaat.
Massakkut pisoq, tassa nunarsuatsinni coronavirusip tuniluunnera pimoorullugu tiguneqartariaqartoq atuarfimmi siunnersorti oqarpoq.
- Meertartagut immitsinnullu paarilluarta. Imaaratarsinnaagamimi suli ulluni amerlanerni taamatut atuanngiffeqartariaqassasut. Paarilluarniarutsigit taamaammat pimoorussisariaqarpugut, Pilunnguaq Petersen naggasiivoq.