Saamimmiit: Elna Søndergaard, Christina Møller Hardenberg aamma Marthine Mathiassen
Inuk innarluutilik kommunimit inunnik isumaginnittumit sullinneqarnermini illersorteqarnissaminut neqeroorfigineqarsinnaalerpoq. Illersuisullu nutaat pingasut illersuisutut sulinissaminnut piareeqqalluinnarput qilanaarlutillu. Illersuisunngortut tamarmik innarluutilinnik sullissisooreerput misilittagaqarluarlutillu.
- Innarluutilinnut siunnersortitut siornatigut atorfeqarnikuuvunga. Massakkullu siunnersuiinnarnanga innarluutilik kommunimi sullinneqarnerani issiaqataasassaanga, malugisassavara susoqarnersoq, innarluutilillu inissisimanermigut sumiinnersoq paasisassallu. Misilittakkakka aallaavigalugit ataqatigiissaarisumik innarluutillip sullinneqarnissaa qulakkeerusuppara. Assersuutigalu innarluutilik ilinnialerusuppat, taava tassunga iliinnarnagu malinnaaffigissavara ataqatigiissumik sullinneqarnissaa qulakkeerniarlugu, illersortinngortoq Christina Møller Hardenberg namminersortutut pillorissaasuusoq oqaluttuarpoq.
Innarluutilinnut illersuisut inuk innarluutilik sapinngisamik inuunera tamaat aquutissiuutissavaat. Illersuisup aamma suliassaraa inuk innarluutilik eqqunngitsumik sullinneqarsoriguni siunnersussallugu sumut naammagittaaliorsinnaaneranik, ajunngitsumillu sullinneqarnissaa qulakkiissallugu.
- Uanga illersortitut sulinissara pissanganartippara, suliffitsinni aamma taanna qitiugami. Innarluutillip qanoq inissisimanerminik paasitinnissaa pingaartippara. Innarluutillip nammineq ingerlariaqqinnissaminut pissassarnissaa anguniassavara, illersortinngortoq Marthine Mathiassen, pissassarfimmi perorsaasuusoq oqaluttuarpoq.
Innarluutilinnut illersortitut suliniaraanni innarluutillip inuunera qanoq innersoq paasinissaa illersortinngortup Elna Søndergaardip oqaluttuaraa, tamannalumi misilittagaqarfigaa.
- Meeqqat innarluutillit ilaqutaalu 1980-kkunniilli sullitaraakka. Taamaattumik innarluutilimmik qitornaqarnermi ajornartorsiutaasinnaasut ilisimaarilluarpakka. Aammalu innarluutilittut meeraalluni inuuneq aamma ilisimaarilluarpara. Isumaqarpunga pingaartuusoq innarluutillip suut pisinnaatitaaffiginerai paasitilluassallugu, suullu ikiorneqarnissaminut pisariaqartinnerai paasilluarnissaa. Ilaqutariit ilai aqqutissiuussisariaqartarput, uagulli tamakkua suliassat tigussavagut, innarluutilinnut illersortinngortoq Elna Søndergaard pissassarfimmi pillorissaasuusoq oqaluttuarpoq.
Innarluutilinnut illersuisunik pisariaqartitsisut kommunimiit innersuunneqarsinnaapput.