Tikikkuminassuseq, paasissutissiineq, ilinniarneq suliffeqarnerlu kiisalu inuuneq pitsaasoq, tassa taakkuupput innarluutilinnut politikkissami nutaami sammisat qitiusut.
Pisortat illuutaat inuinnaallu angerlarsimafii tamarmik tamanut tikikkuminartuussapput, aamma innarluutilinnut. Innarluutillit innuttaasut allat assigalugit paasissutissanik pissarsisinnaatitaassapput. Innarluuteqaraanni innarluuteqanngikkaluaraanniluunniit ilinniarnissamut periarfissaqassaaq. Ilinniakkat inuup innarluutillip ataasiakkaap pisariaqartitai piginnaasaalu malillugit aaqqissuunneqassapput. Tamakkuupput ilaatigut innarluutilinnut politikkissami nutaami sammineqartut ilaat.
2020-2023-mut politikki nutaaq
Qeqqata Kommuniata innarluutilinnut politikkia kingullermik 2009-mi suliarineqarpoq, taamanermiillu innarluutilinnut atugassarititaasut allanngornikooqaat. Taamaattumillu kommunip immikkoortumut takorluugai anguniagaalu isumaliuutigineqaqqipput nutarsarneqarlutillu, innarluutilinnullu politikkimut nutaamut katersorneqarlutik. Siunissami innarluutilinnut politikki minnerpaamik ukiut sisamakkaarlugit nutarterneqartassaaq, innarluutilinnullu politikki una ukiunut 2020-2023-mut atuutissaaq.
Innarluutilinnut politikki nutaat uani atuarsinnaavat.