Naluttarfiup maannakkorpiaq taama isikkoqartillugu ammatinnissaa illersorneqarsinnaanngimmat matoqqaannassaaq.
Sisimiuni naluttarfissaq nutaaq qaarsup iluaniittussaq piviusunngorsinnaajunnaarneranik siorna nalunaarutigineqarmat sisimiuni maanna naluttarfiusoq pisoqalilersimaqisoq suli atorsinnaanersoq paasiniarlugu Danmarkimiit naluttarfilerisartumik tikisitsinikkut misissuisitsisoqarpoq.
Misissuinermi nalunaarusiami oqariartuutigineqarpoq naluttarfiup teknikkikkut atortui tamarmik taarsersortariaqassasut, kiisalu malittarisassat naapertorlugit ammatinnissaa akuerisaanngitsoq. Illutaa aserfallakkiartortup iluarsartuunnissaa eqqarsaatigalugu illuutinut maleruaqqusat naapertorlugit nutaarluinnarmik sanasoqaqqaarluni aatsaat akuerineqarsinnaasoq paasititsiissutigineqarpoq.
Aningaasatigut annertuumik naleqartussamik iluarsartuussinissaq ukioq manna piviusunngorsinnaanngilaq, taamaattumik ukioq manna qaammatini pingasuni ammasussaagaluartoq matoqqaannartussanngorpoq. Qeqqata Kommunia Sisimiuni Maniitsumilu nutaanik naluttarfiliortoqarsinnaanermik silami illup iluanilu periarfissanik misissuilluni aallartereerpoq.