Aaqqissuisut:
Pitsaaliuinermi siunnersortit / Ilaqutariinnik kiffartuussivik
FN-ip (Forening Nation) nunarsuaq tamakkerlugu ilaqutariinnut ullorititaa 15. maj, malunnartinniarlugu Ilaqutariinnermik kiffartuussivimmi sulisut, Pitsaaliuinermi siunnersorti (Albricht Kreutzmann) ataqatigiissaarisoralugu Sisimiuni ilaqutariinnut innuttaasunullu kikkunnilluunniit peqataaffigineqarsinnaasunik aaqqissuinernik assigiinngitsunik ingerlataqarput.
Aaqqissuusseqataasut: Sisimiuni katersugaasivik, Nipilersornermik ilinniarfik, Allorfik, timersoqatigiiffik SSP kiisalu Ilaqutariinnik kiffartuussivik.
Ulloq aallarnerlugu, nal:10.00 katersugaasiviup silataani ammaanersiortoqarpoq, borgmesteri Malik Berthelsen oqalugiarluni. Inuppassuarnik atuartut mikinerniik, inuusuttunit inersimasunit utoqqarnillu peqataaffigineqartumik.
Katersugaasivik takornariarneqarsinnaalluni ammatitsivoq nalunaaqutaq 16.00-ip tungaanut. Nittarsaanneqartut pingaarnersaralugu qanga atuartitsiviusimasup ilusaa atuartitsinermullu atortut. Atuartut mikinerit ingillutik misiliisinneqarput, ABC-nillu erinartalerlugu appisinneqartarlutik, qangatullu allattaaseq atorlugu aterminnik allanneq misilittarpaat. Atuarfinni mikinerni atuartut klassit 4, tulleriiaallutik misiliisinneqarlutillu suliaqartilaarneqarput, puuliannguaq namminneq qalipallugu angerlaatassaminnik pissarsillutik.
Inersimasut kaagillerfigineqarlutillu kissartullerfigineqarput, utoqqaallu oqalungusiaqattaannerat tusatsiarneqarsinnaallutik.
12.00 -15.30 Ilaqutariinnut kiffartuussivik, kikkunnulluunniit gril'likkanik agguaapput, meerarpassuit inersimasut utoqqaallu – inuppassuit – peqataapput.
Siaasakkanik Pisiffik inunnut 50-inut tapiisuuvoq, inuilli najuuttut amerlanerit takkussuummata, pisiniaqqittariaqarsimavugutt kingulliit najuuttut aamma nerisassaqarniassammata.
Meeqqat pølsinik drinkinillu pissarsisinneqarput, inersimasunullu neqit siaasakkat kaffe tii kaaginillu tumannguersaaserneqarput.
Nipilersorpalaamillu tusarnaartitsisoqarpoq, Aqqalu Markussen appisimaartorineqarmat. Peqataasorpassuarnit nuannisigineqarpoq. Meeqqat kiinnamikkut qalipanneqarsinnaanermik periarfissinneqarnertik atorluarlugu kiinnamikkut qalipanneqartut arlaqarput.
Allorfik Sisimiut aamma aaqqissuipput. Meeqqat ilaqutariillu imminnut qalipassinnaallutik.
Ilaqutariinnut skattejagt ingerlanneqarpoq, Allorfiup Nasiffiullu eqqaanni aliikkutaqartitsisoqarluni.
Puuliannguit assigiinngitsunik imallit meeqqanut pissarsiassaatinneqarlutik, allakkanillu akineqarsinnaasunik apeqqutitallit akineqarsinnaasunngorlugit nassaassiarineqarlutik.
Ulloq 14.00-18.00, ilaqutariikkaanerusunik inoqallattaaginnavillutik nuannaartitseqataapput.
Nipilersornermik Ilinniarfik, Taseralimmi kikkunnulluunniit ammasumik tusarnaartitsivoq. Siullermik 16.30-17.30 ilaqutariinnut inuppassuit peqataaffigisaannik
Unnukkut 20.00-00.00
Inersimasunut Åbenscene ingerlanneqarpoq. Nipilersornermik ilinniarfimmi nipilersortartut appittartuliullugit. Inersimasut 50-60 tungaannut nuannisaartinneqarlutik.
Naliliineq. FN-ip nunarsuaq tamakkerlugu ilaqutariinnut ullorititaani 15. maj siullermeertumik Sisimiuni aaqqissuineq iluatsilluinnartutut taasariaqarpoq. Aallartinnermiilli inuppassuit peqataaneratigut malunnarpoq ulloq pisoqarfiusartussatut pisariaqartinneqartoq. Ukiup tullia qilanaarnarsereerpoq.
Ullormi tassani inuppassuit peqataasut qutsavigaavut.
Tigulaarisoq: Pitsaaliuinermi siunnersorti Albricht Kreutzmann