Kangerlussuarmiit Sisimiut tungaanut aqqusinermut siullermut 21 km-iusumik sanaartornissaq pillugu 2020-mi ippassaq ataasinngornermi juunip 15-iani Qeqqata Kommunia aamma MT Højgaard isumaqatigiissuteqarput.
Sisimiut eqqaani Kangerlussuarmiit Kangerluarsuk Tullerup akornanni aqqusinermut Qeqqata Kommuniata ASN-mik nalunaarusiani piffissap sivusuup ingerlareernerani akueritippaa. Kangerlussuarmiit aqqusineq sioraasoq siulleq 21 km malitsigisaanillu ATV-tut aqqut 100 km missaaniitoq Qeqqata Kommuniata neqeroorusiorfigitinnikuuai. Neqeroortitsineq illoqarfigisamit, nuna tamakkerlugu nunanit allanit annertuumik soqutiginnillutik neqerooruteqartunik malitseqarnikuuvoq. kisianni aningaasaqarnikkut pitsaanerpaatut neqeroorut MT Højgaard-imit pivoq.
”Aqqusinermik suliniummik aallartitsisaanissami nuna tamakkerlugu nunallu tamalaat akornanni suliffeqarfiit neqerooruteqarsimanerat pitsaasumik tupaallarnarnikuuvoq. Nunarsuummi sinnerani nunap timaani aqqusinernik sanaartornerit ulluinnarsiutaapput, illuatungaani inoqarfiit marluusut akornanni aqqusinermik sanaartornermik aallartitsinerput aatsaavissuaq Kalaallit Nunaanni pilluni, borgmester Malik Berthelsen oqaluttuarpoq.
”Kangerlussuup Sisimiullu akornanni aqqusinermik aallartisaaqataanissamut MT Højgaard qilanaarpoq. 21 km aallartisaataaginnarnissaat ilimanarpoq, kisianni MT Højgaard-imiit Sisimiunut aqqusineq tamaat peqataaffigissallugu piareersimavugut. Ukioq manna juulip naalernerani pisussatut naatsorsuussaasoq aallartisaanissaq maannakkut pilersaarusiuleruttorparput, Sune Bastrup, MT Højgaard oqarpoq.
21 km siulliit Kangerlussuarmi umiarsualivimmi Kellyville-miit Aasivissuarnut Tasersuarmullu Aqqusineq paarlaasukkoorpoq UNESCO-p nunarsuarmioqatigiinnut kingornussassaqarfiani Aasivissuit-Nipisat, 2018-imi nunarsuarmi kingornussassaqarfinni allattorsimaffinniileruni takusassat pingaarnermi marluusuni Aasivissuit ilagivaat. UNESCO-p nunarsuarmi kingornussasaqarfianiittoq Tasersuaq tasiuvoq 30 km-iusoq, Nipisat/Sisimiuni ukiuunerani piniarfiit aamma Aasivissuit/Kangerlussuup eqqaani aasaanerani piniarfiit akornanni angalagaangamik piniartut kinguaariit qajaq umiarlu atorlugit angallavigisarnikuusaat.
”Maannakkut aqqusinermik aallartitsivugut, nalornisiginngilluinnarparalu Kangerlussuup Sisimiullu akornanni nunatarujussuaq maannakkut tikinneqarsinnaanngornera, Qeqqata Kommunianut Kalaallit Nunaannullu annertuumik iluaqutaassaoq. Kangerlussuarmi innuttaasunut takornarissanullu periarfissanik nutaanik tunisissaaq, aammalu aqqusineq Sisimiunut apissippat periarfissarpassuit allat takkutissapput. Siunissami aqqusinermi cykkilerissannut qilanaarpunga", Malik Berthelsen naggasiivoq.