Tassa Angaju maannakkut fritidshjem-itut atortoq atualertussalerivinngulerpoq 1. august 2020 aallarnerfigalugu. Imaappoq 2015-imi 2016-imilu inunngornikut, 2021-mi 2022-milu atualertussat Angajumiittalissapput 1. august 2020 aallarnerfigalugu.
Aanikasik maannakkut atualertussaleriviusoq meeraateqarfinngorpoq. Tassa 2014-imiit 2019-imi inunngornikut meeraateqarfik Aanikasimmiilissapput. Meeqqeriviit Kuunnguaq aamma Paarsi allanngoratik ingerlaannassapput.
Fritidsklub nutaanngitsoq 1. august 2020 aallarnerfigalugu fritidshjem-itut atulerallassaaq. Augustimiillu 4.-5. klassertut, fritidsklubbertalissapput ungdomsklubbimi Inuusuit-mi atualerunik. Ungdomsklub Inuusuit allanngorani suli 6. klassimiit qummut ualikkut unnukkullu atorneqartassaaq.
Sulisut aqutsisullu aamma piginnaaneri aallaavigalugit pisariaqartinneqarfiinut inissititeqqipput. Imaalissaaq atualertussaasivimmi Angajumi aqutsisunngussaaq Malia Rosing, tullersortinngussallunilu Regine Karlsen, 1. august 2020 aallarnerfigalugu. Taamatullu meeraateqarfissami Aanikasimmi aqutsisunngussalluni Grethe Heilmann, tullersortigalugu Frederikke Therkelsen. Sinnerini meeqqerivinni aqutsisut akornanni allanngortoqanngilaq.
Allanngortiterinerit meeqqeriviit qanimut suleqatigalugit pilersaarusiorneqarlutillu piviusunngortinneqalerput. Angajoqqaallu ataatsimiisinneqareerput allannguinissaq pillugu paasissutissinneqarlutik, meeqqallu sorlernut nuussanersut nassuiaavigineqaqqissaarlutik. Meeqqeriviit tamaavimmik angajoqqaanut paasititsiniaallutik ataatsimiisitsereerput kiisalu fritidsklub fritidshjemmiugallalersoq aamma ataatsimiisitsereerluni.
Ilinniartitaanermut Immikkoortortaqarfiup qutsavigai meeqqeriviit, angajoqqaallu taamatut meeqqerivinnut utaqqisuerunnissaq anguniarlugu sukkasuumik torersumillu qanimut suleqataalluinnarlutik tunniusimallutillu piviusunngortitseqataalermata. Taamaalilluni piviusunngortinneqalerpoq 1. august 2020-miit atuuttumik meeqqerivinnut utaqqisuerunneq.