Persuarsioqaanga, ukiorpassuarni oqaluuserineqartarsimasup, nunatsinnilu oqaluttuarisaanermi aqquserngit takinersariligassagaata, kiisami sanallugu aallartinneqalerneranut, kommunalbestyrelse, innuttaasullu sinnerlugit ullumikkut oqaaseqarsinnaagama.
Kommunini allani ineriartorneq ingiinnarluta, katataajartuutigalutalu isiginnaartuuffigiinnarusunngilarput!
Qeqqata kommuniani aamma uagut ineriartornermut peqataarusuppugut!
Nunarsuarmioqatitta nunatsinnut tikittartut amerlisarneqarnissaannut aamma uagut peqataarusuppugut!
Taamaattumik ullumikkut persuarsioqaanga nunarujussuaq nunatsinni misigisassarsiorluni takornariartitsiffigissallugu (adventure turisme) piukkunnarnerpaat ilagiligassaata, nivariaqqaarfiginissaa ilissi peqatigalusi ingerlassinnaagakku.
Naluneqanngitsutut una aqqusinissarsuaq ukiorpassuarni oqaluuserineqartarsimavoq, ukiunilu taamak amerlatigisuni oqaluuserineqartarnera eqqarsaatigalugu, ilumut piviusunngorsinnaanera innuttaasut ilaannit tupinnanngitsumik upperineqarunnaarsimagaluarpoq.
Oqartariaqarpungalu anguniagaq upperigaanni uteriiserneq tunniutiinnarnaveersaarnerlu imminut akilersinnaavoq!
Uteriisersimavugullu, anguniagarput takornarialerisunit timmisartortitsileqatigiiffinniillu, nunarsuarmi takornarialerinermik ilisimasaqarlutillu misilittagaqartunit, aamma Visit Greenlandimit, upperineqartoq, siuariartortitsinissamullu ilippanaatilittut isigineqartoq tusaasinnaallugulu takusinnaagatsigu.
Tassami kommunerput nunarpullu nunarsuarmioqatitsinnit suli amerlanerusunit tikinneqartalissappat,
ullumikkornit pissanganarnerusunik aningaasanillu atuiffigisinnaasaannik Islandimisuulli, Svalbardimisuulli aamma uagut neqerooruteqartariaqarpugut.
Qeqqatalu kommunianiit isumaqartuaannarsimavugut, Sisimiut Kangerlussuullu akornganni nunarujussuaq, Sermersuarmiit imaanut sineriaqartoq,
siulersuatsinnit namminneq nukitik kisiisa motoreralugit ukiussamut piliniarfigisarsimasaat, Unescomullu eriagisassanngortinneqarsimasoq Aasivissuit-Nipisat,
tuttunik umimmannillu takusassaqarluartoq, tammajuitsussarsiniarlunilu umimmanniartitsffigissallugu periarfissaginnerpaaq,
aasaagaluarpat ukiuugaluarpalluunniit tupinnaannartumik pinnissuseqartoq, 3 km.-ingajannillu takissuseqartumik nunatsinni isumannaannerpaamik mittarfeqareersoq,
aqqusineqalernermigut, aningaasarsiornikkut, takornariaqarnikkuinnaanngitsoq, kisianni aamma issittumi ilisimasassarsiornikkut annertuumik nunatsinnut tapertaasinnaasoq.
Tassami Kangerlussuaq tassaaginannginngilaq Hotelimi Cafeteria!
Kangerlussuup pikkunartua misigissagaanni Cafeteria qimallugu misigisassarsiortoqartariaqarpoq, tamanna uppernarsivarput nunatsinni qinikkat atorfilittaallu nuimanerpaatut oqaatigineqarsinnaasut, februarimi Kangerlussuup kangianut bus-inik takornariartikkatsigit, namminneq nunaminniikkaluarlutik pinngortitamik uumasunillu qanoq alutorsaatiginnitsiginerat takugatsigu.
Tassanilu aamma takuarput uppernarsillugulu aamma ukiuugaluartumiluunniit nunatsinni bus-inik pinngortitami pikkusulluni misigisassarsiortoqarsinnaasoq!
Qanorli nunarsuarmioqatigut illoqarfissuarninngaanneersut tamaaniikkaangamik eqqissineq pilluarnerlu misigalugit pikkusuttarsimassatigissappat!
Taakkualu, ingammik pitsaassutsimik annertuumik akiliiumassuseqartut suli amerlanerusut tikisittalernissaat anguniarlutigit, nunarsuarmi isikkiviginnerpaani hoteliliorfiusinnaasut Sermersuarmut, Pingo-llu ataani tasersuarmut isikkiveqartut, sumiiffinnilu assigiinngitsuni illuaqqiorfiusinnaasut sanaartorfigineqarsinnaasunngorlugit akuersissutigereernikuuagut.
Taamaattumik najuuttusi ilissi, nunarsuarmi isikkiviginnerpaat ilaannik kommunetsinni hoteliliornissamut, aammalu nunarsuarmioqatitta kommunetsinnut Sermersuarmukarnermik qimussernermik, sisorariarnermik, arsarnernillu takunnikkusullutik tikisittalernissaannut suleqataanissassinnut tikilluaqqungaarpassi.
Nunalu taamak angitigisoq aqqusinniornikkut tikikkuminarnerulerneratigut neriuutigaraput periarfissanik allanik, takornariaqarnikkuinnaanngitsoq ammaassiumaartoq.
Takorluulaariartigumi qanormitaava torratsigissagaluarpa, umimmaateqarfimmik tuttuuteqarfimmilluunniit pilersitsisoqarsinnaagaluarpat,
taamaasilluta neqiutigut nunarsuarmi pitsaanerpaat ilaattut taaneqarsinnaasut immitsinnut pilersornerulernissamut nunarsuarmioqatitsinnillu tamaanngaanniit tunisassiarilersinnaagaluarutsigit.
Periarfissarlu manna iluatsillugu siunnersortitut suleqaterput Rambøll, Suliffeqarfiit neqerooqataasimasut, minnerunngitsumillu MT Højgaard, qutsavigiumavakka suliassamik soqutiginnillutik peqataasimanerat pillugu.
MT Højgaard, suliassarsi pillugu isumalluarfigaassi, aamma qularinngilara suliassarsi kusanartumik naammassissagissi, neriuutigaaralu kingusinnerusukkut ATV-inut aqquserngup aqqusinivinngortinnissaanut aamma soqutiginnikkumaartusi.
Taamatuttaaq aqqusinersuup piviusunngortinniarneranut suleqataasimasunut tamanut, kommunalbestyrelse siulerput, ACB, takornarialerisut, suliffeqarfiit assigiinngitsut, Inatsisartut, Naalakkersuisut, minnerunngitsumillu kommunemi sulisutsinnut ukiuni arlalinni suliaminnik upperinnillutik tunniutiinnajuillutillu ilungersuuteqarsimasunut imatut oqarsusuppunga, tamassinnut qujanarsuaq!
Uani pingaarutilimmik suleqataasimasut annertuumik nersugassaavusi! Isumaqarpungalu aqqusinersuup atulernerata kingorna ilungersuuteqarsimanersi kingumut qiviarlugu tulluusimaarutigisassagissi!
Naggaterpiaatigut Inatsisartut Naalakkersuisullu, ATV-inut aqquserngup aqqusinivinngortinnissaanut Kangerlussuarmilu umiarsualiviup piviusunngortinnissaanut inussiarnersumik suleqatiseraassi, takorluulaariarsiummi Sermersuaq, Mittarfissuaq, Aqqusinersuaq, Umiarsualivillu ataatsimoortillugit nunatsinnut sunniutigisinnaasaat!
Assaa ilumut qanoq torrak!
Aqqusinniortussat ingerlalluarnissaannik kissaallutigit, isumalluaqaagut neriulluarlutalu siunissatsinnut, qilanaalereerpugullu neriulluta aappaagu Sisimiuniit cykelerluta ATV-erlutalu tamaanga tikeraarnissassinnut. Aah, ilumut nuannissaaq!