Borgmesterip pisortaanerullu sermersuaq alakkareerlugu uppernarseqqippaat , Kangerlussuup sermersuullu akornanni internetsikkut attaveqanngitsoq. Sumiiffimmi periarfissat – pingaartumik takornariaqarnermut tunngatillugu – oqaluuseraat. Kiisalu takornariaqarneq nalunaarasuartaatikkullu attaviit qanoq ilillutik imminnut ikiorsersinnaanerat oqaluuseralugu.
Borgmesteri Malik Berthelsen angalaarneq pillugu ima oqaaseqarpoq:
- Siullertut TELE-POST nersorusuppara, Kangerlussuarmi naapinnissatsinnut piffissaqarsimammat, tassungalu atatillugu iluarusuutigivara TELE-POSTip Kangerlussuarmi biilinik sukkanniuuttoqarnissaanut (Extreme E) attaveqaqatigiinnermut (internet aamma oqarasuaatit) pillugit pitsaanerusumik atuutilersitsinissaminut periarfissanik misissuisinnaammat. Neriuutigaara aamma siunissami Kangerlussuup Sisimiullu akornanni angallattakkanut napparutinik ikkussuisoqarnissaa. Taamaaliortoqarneratigut angalasut nunarsuup sinneranut atassuteqarsinnaalissammata, isumannaallisaanerlu sumiiffimmi tassani qaffasinnerulissammat.
Amerlasuutigut Nuummiit Kangerlussuarmut mittoqartarpoq ingerlaannarlu Københavnimut ingerlaqqittoqartarluni. Taamaammat Kangerlussuarmi misigisassat annikitsuinnaat angumerineqartarput. TELE-POSTimi pisortaaneq tamanna pillugu ima oqarpoq:
- Kangerlussuarmi pinngortitaq assut kusanarlunilu misigisassanik, uumasunik annertuumillu ilippanartunik ulikkaarpoq. Mittarfik, Qeqqatalu Kommuneani pilersaarutigineqartut - soorlu ATVnut aqqusinissaq Kangerlussuarmiillu Sisimiunut aqqusinniornerit eqqarsaatigalugit, periarfissat pillugit, qanorlu nalunaarasuartaatinut attaviit takornariaqarnerlu aningaasaliiffigisinnaanerlugit oqaloqatigiissinnaagatta nuannaarutigaara.
