Nunarsuarmi anguniagassanik suliniuteqarneq
nungusaataanngitsumik ineriartornermut FN-ip nunarsuarmi anguniagaanik
17-iusunit aallaaveqarpoq. Tamakkuuppullu Qeqqata Kommuniani meeqqat atuarfiini
tamani atuartunut 1300-nut sinaakkutissanik suliaqartitsinissamut pilersitsisut
atuarfinni sapaatip akunnerani 41-mi qulequtarineqartussat. Anguniagaavorlu
pimoorussinerulluni ilikkagaqarnissaq kiisalu atuartut akunnerminni
suleqatigiinnerulernissaat. Suliaqarnermi neriuutigineqartoq tassaavoq,
meeqqanut tamanna iluaqutaassasoq nunarsuarmioqataalernissaat eqqarsaatigalugu,
kiisalu nungusaataanngitsumik ineriartorneq
paasisimasaqarfiginerulerniassammassuk.
Atuaqatigiinni tamani nunarsuarmi anguniagassat
assigiinngiiaartumik suliarineqarput, sapaatip akunneranilu itisiliilluni
suliarineqarsimasut kakkaginartorujussuupput.
Covid-19 killilersuinera pissutaalluni
suliniutinik saqqummiinerit saqqummersitsinerillu klassini ataasiakkaani
ingerlanneqarsimapput, ilaatigut atuartut iPads atorlugit suliniutiminnik
saqqummiisimallutik. Atuartut ilaasa iPads atorlugu saqqummiussatik oqaasertalersorlugit
immiussimavaat, taamaalilluni saqqummiussilluni ilisarititsinerit
tiguneqarsinnaajuaannarlutik.
Atuartut minnerit ilaatigut sapaatip
akunnera atorsimavaat uumasunik naasunik nunatsinnut pisunik kiisalu nunatsinni
uumasut navianartorsiortut pillugit suliaqarnermikkut nunarsuarmilu
anguniagassat pingaarutaat ataasiakkaat eqqartorlugit, tamakkualu allattorlugit
katersorsimavaat ilisimasassatullu iikkanut
nivinngartorlugit.
Atuartut annerit nungusaataannginnerusumik
illoqarfimmik pilersitsisinnaasumik suliaqarput. Atuartut suliniutitik
namminneerlutik suliarisimavaat iPads-iminnullu titartarlugit.
Ilaatigut uani suliniutinik
siunnersuuteqartoqarpoq, soorlu ilaatigut nutaaliaasumik Sisimiuni
Kalaalimineerniarfeqalernissaanik app-imik atortulersukkamik, neriniartarfik
silaannaap pissusaanut naleqquttoq, nerisassat suunerinik allassimaffimmik
suliaqartoqassasoq kiisalu pinnersaasarfik tagiartuisarfilik uffarferujussualik
puaasartulimmik.
Atuarfiit piviusumik takutippaat,
illoqarfitsinni inuusuttut pissutissaqartumik tulluusimaarutigisariaqarivut.
Pitsaasorpassuarnik kiisalu takorluuisinnaallutik isumassarsiarpassuaqartut,
atorneqarsinnaapput eqqarsaatigilluagaallutillu.
Qeqqata Kommunia paasisimasaqarluartunik
nutaaliortunillu inuusuttaqarpoq. Taakkumi tanngassimaarutigilluarsinnaaqaagut!
