Ukiut tamaasa Maligassiusut Show-imi Paarisa, Kalaallit Nunaanni Timersortartut Kattuffiat aamma Elite Sport Greenland timersornerup peqqinnerullu iluani malitassanik nersornaasiisarpoq. Ukioq manna atuarfimmut aalatitsinerpaamut akissarsiassaq Paarisamit tunniunneqarpoq.
Ukioq manna toqqaanermi Qinnguata Atuarfia Kangerlussuarmiittoq Ukiumi Atuarfik Aalatitsinerpaatut toqqarneqarpoq. Atuarfik ukiut kingulliit pingasuni atuartitsinermi anitsiarnermilu aalanerunissamik akuutitsinermik suliaqarnikuuvoq.
Paarisami sulianut aqutsisoq, Kirsten Fencker, akissarsiaq pillugu oqaluttuarpoq: "Timersornermik siuarsaanermik suliniuteqarluarnerpaanik nersualaarinninnissaq siammarterinissarlu taamaaliornikkullu atuarfiit, suliffeqarfiit innuttaasullu najukkaminni timersornermik siuarsaanissamut allanngueqataanissaannik sunniuteqaqataanissaannillu kajumissaarnissaat unammisitsinermi siunertarineqarput."
Qinnguata Atuarfiani misigivaat, atuarnerup ingerlanerani aalaneq atuartut inuulluataarnerannut aamma ilinniarnissamut piumassusaannt nukittorsaataasartoq. Atuarfiup aalanerunissamik sulinermini ilinniartitsisut, angajoqqaat aamma atuartut akuutinneqarnissaat pingaartissimavaa taamaaliornikkkullu suliniummut siammasissumik tapersersorneqarneq qulakkeerluni. Qinnguata Atuarfiata takutippaa, ataatsimoorussamik anguniagalimmillu suliniuteqarnikkut qanoq atuarfik aalanerulersinneqarsinnaanersoq.
Qinnguata Atuarfiani atuarfimmi aqutsisuugallartoq Dorthe Mølgaard, atuarfiup tunngaviusumik timikkut aalatitsitsinera pillugu oqarpoq "ilinniartitsissutigut aaqqissuussagullu assigiinngitsut kalaallit kulturiannik aallaaveqarput. Ullut tamaasa sivikinnerpaamik minutsini 20-ni timimik aalatitsisarnissaq ukkatarineqarpoq, klassikkaarluni ataatsimoorluniluunniit. Suliniut taanna inassutigineqaannarsinnaavoq, akuusut tamarmik akornanni nuannaarnermik annertuumik pilersitsisoq misigigakku."
Qeqqata Kommuniani anguniagaavoq pingaarutilik, meeqqat, inuusuttut inersimasullu ullut tamaasa aalanissamut timigissarnissamullu periarfissaqarnissaat. Meeqqat inuusuttullu ajornannginnerusumik peqqinnartumik aalasumillu inooriaaseqalernissaannut sulinermi siuttuusinnaagatta tanngassimaarutigaarput.
Qeqqata Kommunia Qinnguata Atuarfianut pilluaqqusikutsoorpoq aammalu atuarfiup sulisui, atuartut angajoqqaallu suliniutaannut annertuumut qutsavigalugit. Akissarsiaq Kangerlussuarmi pitsaasumik sulinerup ingerlaannarnissaanut kajumissaataassasoq, aammalu nunatsinni atuarfiit amerlanerusut ulluinnarni atuarnermi aalaneq nalinginnaasutut ilaatilernissaanut isumassarsitissimassallugit neriuutigaarput.
