Takutinneqakkajuttartut Kalaallit Nunaata pinngortitaata kusanartup assii saqqummersitsinermi qitiutinneqanngillat. Taarsiullugu assiliisup inuiaqatigiit nutaaliaasut atuisuunerat aamma Kalaallit Nunaanni takuneqarsinnaasoq takutinniarsimavaa. Finn Larsen-ip anguniarsimavaa assilissat kusanartut akerlilernissaat aammalu eqqarsalersitsilluni. Taamaalilluni Kalaallit Nunaata qanoq isikkoqarsinnaaneranik aamma tigussaasumik takutitsisuulluni.
Finn Larsen 1991-isimili Kalaallit Nunaanni suliaqartarsimavoq, nunarpullu 30-it sinnerlugit tikeraarfigisarsimallugu. Kalaallit Nunaata kujataaniinnerusarsimavoq, 2001, 2011 aamma 2019-nikkunni Kalaallit Nunaata kitaani illoqarfiit qulingiluat qaammatialunni angalalluni ornittarsimavai - avannaani Ilulissaniit kujammut Nanortalik tikillugu. Ukiut 20-it ingerlaneranni minnerpaamik pingasoriarluni eqqaavissuit annerpaat qulingiluat alakkartarsimavai, eqqakkallu ukiut ingerlaneranni amerliartuinnarsimapput.
Assiliisup saqqummersitsinermigut kissaatigaa malunginiarneqaqqullugu inuiaqatigiit nutaaliaasut atuisutut inissisimanerat isumaqartoq siunertarinngikkaluarlugu qimataqartuaannartugut, taamaalilluta tunngaviusumik uumassusillit allat peqatigalugit avatangiiserput mingutsinneqalersartoq. Soorlu silaannarmi naatitsivittut sunniut, kissatsittoorneq taamaalilluni silaannarmik mingutitsineq, nunamilu pissutsit kemiskiusullu assigiinngitsut peqqutaallutik mingutitsineq.
Saqqummersitani assilineqarsimasuni 40-ni eqqaavissuit takuneqarsinnaapput eqqakkanik qaleriissarpassuit akuleriiusut, soorlu puiaasat, batteriit, qisukut, nerisat sinnikui, olie puukui nappartat, saviminikut, umiatsiat glasfiberiusut, asbest, aalisakkanut qassutit, elektronikkit allarpassuillu. Finn Larsen-ip aallaavigaa Kalaalit nunaanni eqqaaveqarneq inuiaqatigiillu tamanna pillugu isummersortariaasaat nunat avannarliit europalu eqqarsaatigalugit tunngaviusumik allaanerunngitsoq. Annertuneruinnarluni aammalu ersarinnerujussuulluni.
Maniitsup Katersugaasiviani 2020 januaarip 28-ata tungaanut saqqummersitsineq alakkarneqarsinnaavoq.
