Frederik nalunngilarput kræftimik napparsimasoq, naatsorsuutigisimanngikkaluarparpulli taamak sukkatigisumik ajortikkiartornissaa qimagunnissaalu. Tassami napparsimalereeraluarluni kommunalbestyrelsemi tunniusimalluni suleqataanini ataatsimiigiartarninilu ingerlatiinnarpaa, taamaattumik assorujussuaq tupappugut tusarlerneqaratta toqusimasoq.
Frederik ukiuni kingullerni sisamani qinikkatut suleqatigisimanerani suliaminut tunniusimalluinnarnini aammalu tamatigut piareersarluarsimalluni ataatsimiititalianut kommunalbestyrelsemullu ataatsimiigiartarnini uteriitsuuninilu ilisarnaatigivai.
Frederik kommunalbestyrelsemi ilaasortaanermini Teknik-imut Ataatsimiititaliami siulittaasuuvoq Ilinniartitaanermullu Ataatsimiititaliamilu ilaasortaalluni. Ataatsimiititalianilu sulinermini meeqqat atuarfiisa, meeqqeriviit, timersoqatigiiffiit, inuusuttut, aalisarnermut piniarnermut aammalu sanaartornermut tunngasut ingerlalluarnissaat pingaartilluinnarlugit suliaminik aallussivoq aammalu sukataarutigisimallugu Sisimiuni aqquserngit angallannermi isumannaatsuunissaat anguniarlugu immikkut ilisimasalinnit nalilersorneqarnissaannut aningaasaliisoqarnissaa.
Frederik sulinermini ilaatigut sakkortusinnaasumik piumasaqaateqartaraluarluni inuuvoq qanilaartoq illarnissaminillu pingaartitsisoq aammalu nulianilu qitornatik nammineersinnaanissaat ilinniagaqarsimasuunissaannillu assut pingaartitsisuunera, minnerunngitsumik panituani ”Ataatata paninnguaminik” taasagaa immikkut sapertaraa nuannersumik maluginiartarpara.
Frederik Olsen siusinnerusukkut Pilersuisumi pisortatut sulisimavoq ukiunilu kingullerni Sisimiut Timersortarfianni pisortatut sulilluni, pisortaanerminilu timersortarfimmi ulluinnarni ingerlatsinermut aningaasartuutikillisaanissaq siunertaralugu aserfallatsaalinermik annertuumik ingerlataqarsimavoq pingaartissimallugulu ullutsinnut naleqquttumik siunissami Sisimiuni timersortarfeqalernissaq.
Kommunalbestyrelse sinnerlugu Frederiup ilaqutaanut misiginneqataanerput matumuuna apuuppara.
Eqqaaneqarnera ataqqinartuuli.
Malik Berthelsen, Borgmesteri.
