Extreme E sukkaniunnissap annikitsualuttaanik pilersaarusiorniarlutik ulluni makkunani Kangerlussuarmiipput taavalu pingasunngorpat nal. 19.00 innuttaasunut ataatsimiitsitsissapput Multihus-imi nutaami. Borgmester Malik Berthelsen peqqutissaqarluartumik qiimmatsaqqavoq.
Kalaallit Nunaanni nittarsaassinerit annersaat.
Nunarsuaq tamakkerluni TV-kanalitigut aamma inuinnaat naapittarfiigisut malinnaapput, nunarsuarmilu tusagassiorfiit annersaannit tusagassiortut Kangerlussuarmut tikissallutik nalunaaruteqarnikuullutik. Najoqqutarisamut nutaamut `docu-sport`-imut, tassani rally/-bilsport silaannaallu allanngoriartornera pillugu pisimasuinnik akuleriisitsinermut soqutiginninneq annertoorujussuuvoq.
Extreme E’-p Saudi Arabiami siullermeerluni poorskimi sukkaniutsitsinera nunani 180-ini Tv-kanalikkut takutinneqarpoq. Nunanit 90-init amerlanerusunit nutaarsiassat 4500-pput. Inuit 87 millionit sinneqartut Extreme-E takuniarlugu oqaaseqarfiginissaanullu inuit naapittarfianiipput, taakkunannga Tik-Tok-imi ilanngussanik takunnittut inuit 18 millioniullutik.
Visit Greenland, Arctic Circle Business aamma Qeqqata Kommunia, Kangerlussuarmi sukkaniunneq nittarsaassinikkut annertunerusumik iluatsitsiffiunissaa pillugu Extreme E-mik qanimut suleqatiginnipput. Ukiuni aggersuni amerlasuuni Kalaallit Nunaannut takornarissat amerlanerusut qammarnissaanut annertuumik pingaaruteqassaaq.
Inuit tusaamasarsuit Kangerlussuarmi sukkaniuffimmiissapput.
Extreme E’p anguniagai annertuut tamakkiisumik anguneqarput, Formula 1-imi arfineq-marloriarluni nunarsuarmi pissartaasoq Lewis Hamilton aammalu siusinnerusukkut Formula 1-imi nunarsuarmi pissartaanikuusut Nico Rosberg aamma Jenson Button sukkaniuteqataasut qulingiluaasuni sukkaniuttartoqatigiinnik piginnittut ilagimmatigit. Sukkaniuteqatigiinni qulingiluaasuni aquttut aammattaaq motorilinnik timersornermi tusaamasaapput qulingiluariarluni rally-mik nunarsuarmi pissartaanikuusumik Sebastian Loeb-imik aamma marloriarluni rally-mik nunarsarmi pissartaanikuusumik Carlos Sainz-imik kiisalu qulaani taaneqartumik Jenson Button-imik siuttoqarlutik.
Saudi Arabiami rallycross-imi pingasoriarluni nunarsuarmi pissartanngornikuusoq Johan Kristoffersen kiisalu nunarsuarmi arnani australiami rally-mik sukkaniuttarnermi siullersaalluni pissartaanikuusoq Molly Taylor peqatigalugu ajugaapput. Extreme E-mik sukkaniunnerit sukkaniuteqatigiinnik arnamik angummillu inuttaqartarput, tamannalu nunarsuarmi motorilinnik timersorfiusartuni angutinit aqunneqarnerusumi siornatigut takuneqarnikuunngilaq.
Silaannaap allanngoriartorneranik ukkataqarneq.
Sukkaniunnerit tulleriiaat nutaat nunarsuarmi sumiiffinni assigiinngitsuni tallimani, silaannaap allanngoriartorneranik ersarinnerpaaffiusuni ingerlanneqassapput. Taakkunani tamani suussutit tullinnguuttut tallimaasunut iluanni sukkaniuttoqassaaq. Inuilaap annertusiartornera, Immap qaffakkiartornera, Nunat issittut, Kiattup orpippassui kiisalu Sermersuup aakkiartornera.
Ammaanersiornermi Extreme E-p pilersaarutaa:
1. Inuilaap annertusiartornera – Saudi Arabien-imi Alula ulluni 3.-4. april
2. Immap qaffakkiartornera – Senegal-imi Lac Rose ulluni 29.-30. maj
3. Nunat issittut – Kalaallit Nunaanni Kangerlussuaq ulluni 28.-29. august
4. Kiattup orpippassui – Brasilien-imi Amazonas-imi Para ulluni 23.-24. oktober
5. Sermersuup aakkiartornera – Argentina-mi Tierra del Fuego ulluni 11.-12. december
Extreme E annertuumik `eqqaamanneqarnermik` pilersaaruteqarluni ingerlatsivoq, tamatumani silaannaap allanngoriartorneranut tunngatillugu allanngueqataasinnaaneq Extreme E-p siunertaralugu. Extreme E Kangerlussuartaanut atatillugu UNICEF Grønland-imik, Kalaallit Nunaanni meeqqat atuarfiannut silaannarmut atuartitsinissamut atortussanik suliaqarluni ingerlatsisumik isumaqatigiissusiornikuuvoq. Suliniutit allat aggustimi sapaatip akunnerani sukkaniuffimmi nunarsuarmi tamani tusagassiorfinnut saqqummiunneqassapput, Malik Berthelsen qilanaavataartoq aammalu www.extreme-e.com aqqutigalugu ingerlaavartumik malinnaasuusoq oqaluttuarpoq.