Qujanartumik inatsisitigut taamatut periarfissiineq ukiuni makkunani Sisimiuni Maniitsumilu piginneqatigiilluni inissialiornermi innuttaasunit amerlasuunit soqutigineqarluarpoq. Tamannali Namminersorlutik Oqartussat aningaasaliissutaat taamak killeqartigitillugit Qeqqata Kommuniata karsianut akisuallaalersinnaavoq. Tamannalu tunngavigalugu kommunalbestyrelsemi aalajangerpugut Namminersorlutik Oqartussat ukiumut aningaasaliissutaat 12,4mio.kr. kommunillu nammineq aningaasaliissutai 7.4mio.kr. nungukkaata allatut ajornartumik ukiup sinneranut qinnuteqartut allat itigartinneqartalissasut.
Innuttaasut amerliartuinnartut piginneqatigiillutik inissialiornerat pitsaasutut isigigaluarlutigu, aningaasaliissutaasut sipporlugit kommunimi aningaasaliisassagutta inatsillu malillugu aatsaat ukiut 30-t qaangiunneranni taarsersugassangortarneri eqqarsaatigalugit, taamatut ingerlanissaq kommunip tigoriaannarnik aningaasaataanut ulorianartorsiortitsilissammat, kommunip karsia illersorniarlutigu killiliinissaq avaqqussinnaanngilarput. Tassami ukiuni kingullerni 4-ni piginneqatigiilluni inissialiorniartunut katillugit 58mio.kr. taarsigassarsiaritissimavagut.
Paasissallugu pingaaruteqarpoq Namminersorlutik Oqartussaniit aningaaaliissutigineqartut ukiumut 12.4 mio.kr. piginneqatigiilluni inissialiorniartumut peqatigiiffimmut ataasiinnarmut 10-inik inissiartaqartumut taamaallaat naammammata. Assersuutigalugu Sisimiuni Maniitsumilu ukiumi aningaasaliiffiusumi ataatsikkut qinnuteqartoqartillugu taamaallaat illoqarfiup aappaannaanut aningaasaliissutit atorneqarsinnaapput. Eqqaamaneqassaarlu aningaasaliissutigineqartut piginneqatigiilluni inissialiornerup saniatigut Inatsimmi periarfissiissutigineqartunut allanut, soorlu nutaanik illuliornermi, utoqqalinersiallit illuisa iluarsaanneqarneranni, illunik pioreersunik iluarsaassinerni aamma matussusiiniartussaammata. Taakkuli Inatsimmi periarfissiissutigineqartunut amigarput.
Taamaattumik Inatsisartut inatsisiliamik innuttaasunit amerlanerusunit atorneqarnissaat kissaatigigunikku, tassa amerlanerusut namminerisaminnik illuliussappata utoqqalinersiallillu amerlanerusut illuminnik iluarsartuussissappata Inatsisartut aningaasaliissutitik qaffattariaqarpaat. Ukiunimi makkunani piginneqatigiillutik inissialiorniarlutik aammalu utoqqalinersiallit illumik iluarsaanneqarnissaannut periarfissap ilisimaneqarneruleriartornera iluatigalugu saaffiginnittartut amerliartortut takusinnaavarput. Taamaattumik Inatsisartut inatsisiliamik atorneqarnissaat namminneq naammattunik aningaasaliinermikkut akisussaaffigisariaqaraat Qeqqata kommuniani isumaqarpugut. Taamaattoqanngippammi inatsimmi periarfissiissutigineqartut innuttaasunit ikitsuinnarnit atorneqarsinnaassapput, tamannalu inatsisartut inatsisiliornerminni siunertaanut naapertuutinngilaq.
Malik Berthelsen Borgmester