Siullermik Lârsêqqap nulia Anso, ernerat Aputsiaq erngutaaraallu marluk, ilaqutaasullu tamassi pilluangaaritsi!
Aammalu immikkut qutsavigiumavara ukiorpassuarni Lârsêqqap qanimut suleqatigisimasaa Klavsi, Lârsêqqap eqqaassutissalerneqarnissaanik aallaqqaataaniilli ullaaq manna tikillugu Lârsêqqamik ataqqinnilluni isumaginnittuusoq, Klavs suliannut kusanartumut qujanarsuaq, pikkoreqaatit!
Piumaffigilaassavakkillu tamatta sinnerluta eqqaassutissamik suliarinnittumut Christian Rosing-imut qujanerput apuutilaarumaarit. Isumaqarpunga Christiap ukioqqortusereeraluarluni eqqumiitsuliortutut nammineq kiffaanngissuseqarluni suliani kusanarluinnartumik suliarisimagaa.
Suliaq angisooq sunaluunniit inuup kisimiilluni suliarisinnaanngilaa.
Taamaakkaluartoq inuup ataatsip piumassuseqarnermigut inuiaqatigiinnut qanoq angitigisumik sunniuteqarsinnaatiginera takusarparput.
Sisimiut eqqaaneqaraangat Arctic Circle Race eqqaanngitsoorneqarsinnaanngilaq.
Aamma Arctic Circle Race eqqaaneqaraangat pinngitsoorani eqqaaneqartoq tassaasarpoq, Arctic Circle Racep aallarniisua Lârsêraq Skifte.
Lârsêqqamik siusippallaamik annaasaqarnerput tamatsinnut alianaraluaqisoq, nuannaarpunga suliarisimasarpassui kingumut nuannersumik eqqaallutigit tamaani katersuunnerput pillugu. Lârsêraq inuusimavoq tupinnaannartumik siunissamut takorluuisinnaassuseqarlunilu annertuunik eqqarsaatersortartoq, aammalu sisoranerup tungaatigut qamussuarnillu atuinissamut immikkut piginnaaneqarnermigut siullermik Maniitsup kommunerisimasaanut kingusinnerusukkullu Sisimiut aamma Qeqqata kommunianut, nunatsinnullumi malunnaateqarluni inuusimasoq.
Lârsêraq inuusuttuunermini ukiuni 8-ini USA-imi Alaskamilu najugaqareerluni,
Maniitsumut angerlarami inuusuttoqatimi akornanni timersornerup tungaatigut nuannaartorineqarsimavoq aammalu ikinngutini peqatigalugu sisorafiusinnaasumik pitsaasumik ujarlernerminni Apussuit nassaarisimavaat, kingusinnerusukkut sineriatsinniit sisorartartut inuusuttut Apussuarni katersuutsinneqartalernerannik kinguneqartumik.
Lârsêqqaap sisoranerup tungaatigut piginnaaneqarnini pissutigalugu, 1980-imi USA-imi ukiaanerani olympiadeqarnerani kalaallit qallunaallu nunanut allanut unammisartuinut sungiusaasuutigaluni aqutsisuusimavoq, kingusinnerusukkullu nunatsinni sisorartartut kattuffianni aamma siulittaasuusimalluni.
Isumaqarpunga oqaatsit ukua, sunaluunniit isumassarsiaq qanorluunniit angitigilersinnaavoq, Lârsêqqaamut atussallugit assorujussuaq naleqquttut. Nunarsuatsinnimi illoqarfippassuarni timersuutini assigiinngitsuni aaqqissuussisarnerit, soorlu Sverigemi vasalopi, Berlin-imi New York-imilu maraton il.il, illoqarfiit ilisarnaataannut aningaasarsiornikkullu pingaaruteqalersimasut ilisimavagut. Lârsêqqallu angisuumik eqqarsaateqartarnerata piumassuseqarneratalu uppernarsarpaa, nunatsinni timersornikkut aaqqissuussat angisuut, nunallu timaani illoqarfimmi atortulersuutit qimallugit torrallatamik ikioqatigiinnikkut aamma aaqqissuunneqarsinnaasut. Arctic Circle Race-mi Lârsêqqap ima torrallassimatigivaa, allaat Sisimiut ilisarnaataasa pingaaruteqarnerit ilagilersimallugu, aammalu illoqarfipput Sisimiut 5.500-inik inulik, nunarsuup assinganiluunniit ersinngitsoq, nunarsuarmi sumiiffippassuarni ilisimaneqalersissimallugu allaat, naak suliarujussuaq imaannaangitsoq nunaqqatitsinnit nammineq kajumissutsiminnik suliaqartunit taamaallaat aningaasaliissutillu killillit atorlugit suliaagaluartoq.
Qularinngilaralu Lârsêqqap Arctic Circle Race pilersinnialeramiuk takorlooreersimagaa, pinngortitarsuatta apummik qallerneqarsimalluni pikkunassusersuata nunarsuarmioqatitsinnit kalaaleqatitsinnillumi qanoq ajasoorutigineqartigisarnissaa. Tassami uanga nammineq Arctic Circle Race-mi peqataasarninni uppernarsillugulu takusarpara, pinngortitarsuatta alutornassusersua aammalu silap pissusaata tiimimiit tiimimut qanoq allanngupallassinnaatiginera, peqataasunut misigissutsitigut qanoq angitsigisumik attuitigisarnersoq.
Ilisimavaralu ilaatigut tamakkua pissutigalugit peqataasartuniit uteqqiaffigineqalersimasoq aammalu peqataasartorpassuarnut inuttut eqqarsartaatsikkullu nukittunerulersitsisimasoq.
Lârsêqqallu Arctic Circle Race-ip tungaanut nalaanilu tusaamaneqaatigivaa imminerminut peqqinnanngikkaluartumik ilaquttani takorpiassaarlugit unnuppassuarni sinippiassanani sulerujussuartarnini. Namminerlu uanga peqataasarninni takusarpara peqataasuniit aammalu nunatta avataaneersunit suliai ilisimasailu pillugit qanoq inuttut ataqqineqartiginera.
Taamaattumik isumaqarpunga Lârsêqqap kommunitsinnut tunniussimasaa imaannanngitsoq, illoqarfittalu nunarsuamioqatitsinnut tusaamaneqalersissimanera pissutigalugu eqqaassutissalerneqarnera pissusissamisoortoq. Eqqaassuitissalerneqarneratigummi illoqarfitta avataaneersut kinguaagullu kulturikkut illorsuatsinnukartut, taamaasillutik eqqaassutissamik oqaluttuunneqartassapput Lârsêqqap kinaaneranik aammalu Arctic Circle Race-ip suuneranik qanorlu pingaaruteqartigineranik.
Isumaqarpungalu inissisimaffia torraanerusinnaanngitsoq! Tassami Lârsêqqap tamaani inissinneqarnermigut, kalaaleqatigut, nunarsuarmioqatigullu peqataajartorlutik nunaqqatsitsinnit inupparujussuarnit ingerlalluarnissaannik kissaassiffivigineqarlutik, pissangallutik qilanaarlutillu aallakaalersut, taamaasilluni tamaanngaannit qungujulalluni isiginnaartassavai, eqqarsaatersuutigalugulu nunaqqatini qanoq angitigisumik anersaakkut pisuunnguutigitigisaannik qimatsivigisimallugit.
Naggasiutigalugulu Tønnes Kreutzmannip taalliaa tigulaariffigalugu Lârsêqqamut tulluartillugu issuaavigerusuppara,
“Silarsuaq alianaak, suna tamarmi nipaallivoq,
Makillutit suligit maani, tunissutaammat sulinerit
Qujavunga ajornanga iterluartitaagama”
Lârsêqqap eqqaaneqarnera ataqqinartuuli.
