Nuannaarutigaara atuartut peqqissusaasa misissuivigineqarnerini atuartuni angajullerni atuartut amerlanersaat pujortartannginnerat paasigatsigu.
Taamaakkaluartoq isumaqarpunga 7. -8. klasse-miit 9. - 10. klasse-mut ikaarsaarnermi atuartut pujortartartut 5 %-imiit 30 %-imut amerleriartarnerat, minnerunngitsumillu 15 - 24 akornganni ukiullit 62%-ii ullut tamaasa pujortartarnerat assorujussuaq ernumanartuusoq.
Isumaqarpungalu inuusuttuarartatta taamatut ukioqalernerminni pujortartalertarnerat taamaattussaannartut isigalugu akuerineqartutut ittarnera uggornartuusoq. Isertuutissanngilaralu inuusuttuaqqat pujortartalersimasut takugaangakkit tamatigut aliatsattarama. Tassami nunarsuarmi asanerpaasatta erliginerpaasattalu timaasa tupamik aserorterneqartarnerat isumaqarpunga alianartuusoq.
Taamaattumik meerartatta kommunitsinni tupamik isigisaat annikillisikkusullutigu plakat-imik saqqummersitsivugut qulequtserlugu, ”kinguaariit tulliinut ingerlateqqissavarput?”
Taamaasiornitsinni soorunami angorusutarput tassaavoq uagut angajoqqaatut pitsaasumik peqqinnartumillu ileqqoqarnitsigut meerartatta pujortartalinnginnissaannut qanutut maligassiuisinnaanitsinnik eqqarsaatissinneqarnissarput.
Neriuutigeqaaralu uagutsinnuinnaq pinnata meerartattali peqqissuunissaat pingaartillutigu, kommunimi tupamik atuinnginnerpaalernissarput tamatta isumaqatigiissutigalutigu anguniassagipput. Takorluulaariarsiullu tamatuma anguneratigut nuannersumik nunatsinni tusaamaneqaatigilersinnaagutsigu qanormitaavami tulluusimaarnartigissagaluarnersoq. Tamatumalu anguniarnissaanut tamassi inussiarnersumik peqatiseraassi.
Malik Berthelsen, Borgmesteri.
