airplanebooksbriefcase business cogs cross election entertainment fish house law lockmedicalpeopleselfservices socialtax

Missingersuutit 2022

Qeqqata Kommuniata 2022-mut ukiunullu missingersuusiorfiusunut 2025 tikillugu missingersuutai kommunalbestyrelsimit akuersissutigineqarput.
11. november 2021

Qeqqata Kommuniani 2022-mut missingersuutit piareerput

- 2022-mut aammalu 2023-miit 2025-ip missingersuutit tungaanut ataatsimut isigalugit 14,1 million koruuninik sinneqartoornissaq siunniunneqarpoq, tamannalu naammagisimaarnarpoq, borgmester Malik Berthelsen (S) naliliivoq.

Qeqqata Kommuniata 2022-mut ukiunullu missingersuusiorfiusunut 2023-2025-mut missingersuutissai Kommunalbestyrelsip 28. oktoberimi ileqquusumik ataatsimiinnermini akuersissutigai. Tamatuma saniatigut tallimanngorneq 5. november atsiorneqartumik Qeqqata Kommuniata kommunit allat peqatigalugit kommuninut ataatsimoortumik tapiissutit pillugit Namminersorlutik Oqattussanut isumaqatigiissuteqarallarput.

Ataatsimut isigalugu, tassa siunissaq qaninnerusoq aamma ungasinnerusoq isigalugit, Qeqqata Kommuniata aningaasaqarnerata pitsaasumik aammalu attanneqarsinnaasumik inissisimanera kommunalbestyrelsip tungaaniit naammagisimaarneqarpoq.

Kommunip aningaasaqarnikkut inissisimalluarneranut pissutaasut ilagaat Qeqqata Kommuniata isertitaasa amerliartornerat, tamatumalu saniatigut sanaartugassatut pilersaarutit naatsorsuutigisamik arriinnerusumik ingerlanneqarnerisigut aningaasaatit tigoriaannaat amerliartornerisigut aningaasartuutissanut sillimmatissat isumannaatsumik inissisimasoqarmat.

- Peqqinnartumik attanneqarsinnaasumillu kommunip aningaasaataasa aqunneqarnerat isumaqarpoq kommunimut akileraarut allanngortinnagu 26 procentimiitiinnarsinnaagipput. Taamaattorli soorunami aningaasartuutit ingerlaarneri nakkutigeqqissaagassaraagut, pingaartumik ingerlatsinermut aningaasartuutit eqqarsaatigalugit kiisalu amma sanaartornermut aningaasaliussat piviusorsiortumik tulleriaarneqarnissaat nangittumik sulissutigissavarput, borgmester Malik Berthelsen (S) erseqqissaavoq.

Atuilluartuulluni ineriartortitsineq

Borgmesteri Malik Berthelsen erseqqissaavoq qaqugukkulluunniit atuilluartuulluni ineriartortitsineq aallaavigalugu kommunip aningaasaqarnikkut aqunneqarnera anguniagaallunilu aallaavigineqartoq.

- Kommunerput ineriartupiloorpoq. Politikkikkut qanoq aalajangertarnigut aalajangiisuulluinnartarput kommunitsinni inuussutissarsiutitigut ineriartornerup qanoq iluseqarneranut, taamaammat mittarfissuit sanaartorneqarnerannut atatillugu tunniutiinnartutut inissinnata aaqqiissutaasinnaasut allat atorlugit inuussutissarsiutitigut ineriartortitsineq aqqutissiuunniarsimavarput sulilu aqqutissiuunniarlutigu, pingaartumik takornariaqarnerup misigisassarsiortitsisarnerullu ineriartortinneqarnissaat matumani aqqutissiuunniarsimallutigu, tassami pinngortitarsuaq assissaqanngitsoq neqerootutigisinnaasarput kommunitsinniippoq aammalu nunarsuarmi kingornussassaqarfittut kommuniunerput atorluarniarlugu aamma aqqutissiuussivugut.

- Taamatulli oqareerlunga aamma erseqqissaatigissavara innuttaasut ukioqatigiikkuutaat ineriartornerat pissutsinik allannguinermik kinguneqartussaasoq soorunami eqqumaffigilluinnaratsigu tamannalu pillugu sillimmartaalereernikuugatta, tassami kommunit allat assigalugit kommunitsinni utoqqalisut amerliartorput aammalu sulisinnaasutut isumalluutit ikiliartulerlutik. Taamaammat aamma taanna pillugu atuilluarnermik aallaavilimmik ingerlatsinissaq aningaasaqarnermut kalluaasumik pilersaarusiornitsinni suliassanillu tulleriaarisarnitsinni pingaartitaraarput, borgmester Malik Berthelsen nassuiaavoq.

Sanaartugassat ingerlasut pilersaarutigineqartullu nutaat

Sanaartugassanut tunngatillugu kommunitsinni sanaartornermik suliaqartut 100 procentimut killingajaleqqapput, tamatuma malitsigisaanik sanaartugassatut pilersaarutisatta ilaat naatsorsuutigisamit akisunerulereerput sanaartorniarlutik neqerooruteqarsinnaasut suliassaqarpallaalernerat pissutaalluni, tassani mittarfissualiornerit annertuumik pissutaaqataapput, tamatumalu nassataanik kommunimit pingaarnersiuinermi tulleriaarneqarsimasut piviusunngortinneqarnissaat arriinnerusumik ingerlanneqartalersimanerat malunniuteqalereerpoq. Taamaammallu sanaartugassat annertuut piviusunngortinneqarnissaat kingusinnerusukkut aatsaat pisinnaassasut kommunimit sillimaffigineqarpoq.

Taamaattorli 2022-mut ukiunilu missingersuusiorfiusuni 2025 tikillugu missingersuutini sanaartukkat ingerlanneqartut nutaatullu ingerlanneqartussatut aalajangiunneqartut aamma inissaqartinneqarput:

  • 43 millioner koruunit 2022 ilanngullugu Atuarfik Kilaaseeqqap nutarsarlugulu iluarsartuunneqarneranut atugassat.
  • 10 millioner koruunit Sisimiuni meeqqanut ulloq unnuarlu angerlarsimaffiliornermut atugassat.
  • 5,4 millioner koruunit kommunit peqatigiillutik eqqagassalerinermut tunngatillugu ingerlatseqatigiiffiannut ESANI-mut atugassat.
  • 1,5 millioner koruunit Sisimiuni Maniitsumilu naluttarfiliornissat nangittumik pilersaarusiorneqarneranut atugassat.
  • 10,8 millioner koruunit Atammimmi Kangerlussuarmilu inissialiornernut atugassat.
  • 8,5 millioner koruunit sanaartorfissagissaanermut atugassat.

Katillugit missingersuutini 96,6 millioner koruunit sanaartornermut aningaasaliussat amerlassuseqarput.

Iliuusissat nutaat allat

Ataatsimut isigalugu kommunep missingersuutaasa oqimaaqatigiissinniarneqarnerat unamminaraluartoq, taamaattumillu tulleriaarinerit sakkortuut suliassaqarfinni arlalissuarni aamma nalaanneqaraluartut, iliuusissat allat nutaat pingaartumik inuussutissarsiornermik ingerlataqartunut iluaqutaasussat missingersuummi ilanngunneqarput.

- Kommunitsinni inuussutissarsiortorpassuaqarpugut piffissami sivitsulersumi covid-19-imit akornusersorneqaraluarlutik siunissamut upperinnillutik naleqqussarsimasunik. Pissutsit qanoq innerinut annertuumik naleqqussarsimapput aammalu nalunngilara upperigaat naatsorsuutigalugulu ajornartoorneq aqunneqarsinnaallualereersimappat suli nukittunerullutik inuussutissarsiutinik ingerlataminnik ingerlarsoqqilertumaartunik. Taamaattorli aamma inuussutissarsiutit ilaat misikkarilluinnartuupput taamaammallu ajornartoornerup malitsigisaanik annertuumik eqqugaasimasunik oqilisaanneqarlutillu tapersersorneqartariaqartunik. Taakku aamma kommunalbestyrelsip tungaanit isumagineqarput, ilaatigut aalisartut piniartullu inerisaanissaannut atugaasigullu pitsanngorsaaviginninnissamut 10 millioner koruuninik immikkoortitsinikkut. Tamatuma saniatigut aamma kommunalbestyrelsi aalajangerpoq inuussutissarsiutitigut siunnersuisarfimmut Arctic Cirkle Businnes-imut aningaasaliuttakkat 1 million koruuninik qaffanneqarput, borgmester Malik Berthelsen erseqqissaavoq.

Missingersuutit suliarineqarnerat:

  • Siullermeerneqarnera 30. september.
  • Aappassaaneerneqarnera 28 oktober.