Taamaalilluni inissiaqarfinni aalajangersimasuni (takuuk takussutissiaq) ineqarnermut akiliutit 2 procentimik qaffariaateqalaartussanngorput.
28. oktober Qeqqata Kommuniani kommunalbestyrelsip ileqquusumik ataatsimiinnerani A/S Inissiaatileqatigiiffik INI-p innersuussutigisai naapertorlugit inissianut akiliutit nalimmassarneqarnissaannik innersuussutigineqartoq Kommunalbestyrelsimi amerlanerussuteqartut akuersissutigaat.
Borgmesteri, Malik Berthelsen (S) erseqqissaavoq ukiut ingerlanerini nalimmassaaneq ataavartumik ingerlanneqarnikuummat Qeqqata Kommuniani annertuumik qaffaanissaq pisariaqartinneqanngitsoq:
- Qeqqata Kommuniani pingaartipparput innuttaasut pitsaasunik najoruminartunillu najugaqarnissaat qulakkeersimaniassallugu. Taamaammat akit akissarsiallu nalingisa ineriartornerinut nalimmassaanikkut aammalu aserfallatsaaliinermut aningaasat pisariaqartinneqartut sapinngisamik eqqanaarniarneqarnissaat anguniartuarparput, ilaatigut ineqarnermut akiliutit malinnaatinneqarnerisigut tamanna pisarluni.
- Ataavartumillu inissianik attartornermut akiliutit nalimmassarneqartarnerisigut ataatsikkorsuaq qaffaanissaq pinngitsoortissinnaagatsigu iluarisimaarnarpoq, taamaaliornikkut Kommunip inissiaataasa aserfallatsaalineqarnissaannut isumannaatsumik kommunitsinni ingerlatsinerput Kommunalbestyrelsimi amerlanerussuteqartut kingumut akuersissutigivaat, borgmesteri erseqqissaavoq.
Inissiat pitsaasut najoruminartullu
Borgmester Malik Berthelsen erseqqissaavoq najugaqarfinni pineqartuni 2 procentimik qaffaanissamik aalajangernerup malitsigisaanik kommunini tamani aammalu Namminersorlutik Oqartussat inissiaataannut sanilliullugu kinguaattoorutit appasinnerpaanerat sinnassaasiunneqassanngitsoq:
- Soorunami kinguaattooruteqarusunnanngikkaluaqaaq, nuannaarutigaluguli nalunaarutigisinnaavara kommunini tamani kinguaattoorutigut ikinnerpaammata. Tassa kisitsisit kingulliit naapertorlugit kommuniinnarnut tunngatillugu 1,1 milliard koruunit nalinginut kommunit iluarsaassinissamut kinguaattoorsimammata Namminersorlutillu oqartussat inissiaataanni iluarsartuussinissamut 1,8 milliard koruunit missaannik kinguaattooqqallutik. Taakkunannga Qeqqata Kommuniata inissiaataanni kinguaattoorutit 2016-mi 82 millioner koruuniupput. Tamatuma takutippaa piviusorsiortumik akisussaassusilimmillu ingerlatsinitsigut malinnaasinnaanerput illersorneqarsinnaasoq, Borgmester Malik Berthelsen oqarpoq.
Qeqqata Kommuniata inissiaatai attartornermut akiliummik nalimmassaavigineqartussat ukuupput:
Sisimiut:
Najugaqarfik 08-268: Kussangasoq, Ujaqqerivik, Narsannguaq, Umiivitsiaq, Niviarsiaq, Salliaq, Qeeqi blok 1-8 aamma blok 12-14, Tuapannguanut blok 1-10.
Maniitsoq:
Ungusivik B-1260 – B-1271
Qaqqaralak B-550
Illunnguit B-598
Annertusooq B-1057 – B-1066
Annertusooq B-987, B-988, B-989, B-990, B-993 & B-994
Niels Lyngep Aqq. B-961 – B-963
Utoqqaallu pisinnaanerusut illui ukuusut:
Niels Lyngep Aqq B-1010
Annertusooq B-1399
Annertusooq B-1378 – B1380