Ukioq manna kommunalbestyrelsip ileqquusumik ataatsimiinnerani kingullermi 25. novemberimi pisumi kommunalbestyrelsi aalajangerpoq Qeqqata Kommuniani meeqqat atuarfiinut ataatsimoorussamik pitsaassuseq pillugu nalunaarusiaq Ilinniartitaanermut ataatsimiititaliamut suliarisassanngorlugu utertinneqassasoq, taamaaliornikkut qulaajarneqassaaq pissutsit suut atuussimammata klassit alloriarfinniittut misilitsinnerminni piginnaasamikkut kinguariarsimanerat aammalu nuna tamakkerlugu agguaqatigiissitsinerup ataani inissisimasoqarnersoq.
Kommunalbestyrelsip pitsaassuseq pillugu nalunaarusiaq 2020-2021-moortoq suliarereermagu borgmester Malik Berthelsen (S) ima oqarpoq:
- Kommunalbestyrelsimut pingaaruteqarpoq meeqqat atuarfiisa pitsaasumik toqqissisimanartumillu ineriartornissaanut atugassaqartitsinissaq. Tamanna uuttorneqarsinnaassaaq meeqqat atuartut atuarnerminni angusaasigut, tamannalu uuttorsinnaalluarparput ukiumoortumik pitsaasusseq pillugu nalunaarusiatigut.
- Ajoraluartumik pitsaassuseq pillugu nalunaarusiap kingulliup ersersippaa pissutsit arlallit ernumanartumik inissisimasutut taaneqartariaqartut. Tassami alloriarfinni misilitsinnerit ersersippaat Qeqqata Kommuniani meeqqat angusaat nuna tamakkerlugu agguaqatigiissitsinerup ataaniiginnaratik aammali misilitsinnerni angusat 2020-mut sanilliullugu appariaateqangaatsiarsimasut, naak sammisani aalajangersimasuni angusat ilai qaffariaateqarsimagaluartut.
- Nalunaarusiaq tunngavigalugu qulaajagassat arlaqarput, taamaammat pissusissamisuussaaq atuarfiit ataasiakkaarlutik itisilikkamik nassuiaateqartinneqarnissaat, tassuuna paasilluarniassagatsigu angusat ataatsimut isigalugit pitsanngoriaateqarsimannginnersut aammalu pitsaassutsip qaffassarneqarnissaa pillugu suliniutit qanoq ittuunersut aammalu pilersaarutit suut ingerlanneqarnersut nuna tamakkerlugu agguaqatigiissillugu angusanut nallersuussinnaasoqalernissaa, sapinngisamillu qaangersinnaanissaa angujumallugu, borgmesteri Malik Berthelsen (S) oqarpoq.
Ilinniartitaanermut ataatsimiititaliap siulittaasua, Evelyn Frederiksen (S) naammagisimaarinnippoq nalunaarusiaq ataatsimiititaliamut suliassanngorlugu kommunalbestyrelsimit ingerlateqqinneqarmat.
- Qeqqata Kommuniani meeqqat atuarfiini suli pitsaanerusumik ingerlasoqarnissaa pillugu tamatta akisussaaffimmik tigusinissarput assut pingaaruteqarpoq. Pitsaassuseq iluatsilluartumik qaffassassagutsigu aammalu nalunaaruteqarani atuanngitsoortarnerit annikillisassagutsigit, taava tamatta akisussaaffimmik tigusisariaqarpugut, atuartuugutta, ilinniartitsisuugutta, atuarfinni aqutsisuugutta, atuarfinni siulersuisuugutta, angajoqqaajugutta, politikeriugutta oqartussaasullu sinnerlugit ulluinnarni meeqqat atuarfiata ingerlatitaaneranut suliaqartuugutta, ilinniartitaanermut ataatsimiititaliap siulittaasua, Evelyn Frederiksen (S) erseqqissaavoq.
Evelyn Frederiksen ilanngullugu erseqqissaavoq ataatsimiititaliap tungaanit qulaajaanerit suliassallu isumagineqareerpata siunertaasoq tullissaanik ileqquusumik kommunalbestyrelsi ataatsimiinnissaannut februar 2022-mi ingerlanneqartussamut itisiliissutaasumik nassuiaammik piareersaasoqassasoq.
Ataatsimut isigalugu meeqqat atuarfiisa avatangiisiisa pitsaassusaat piffissamut naleqquttuupput aammalu ataatsimut isigalugu ilinniartitsisoqarnerup atuarfinnilu aqutsisoqarnerup tungaatigut atuarfinnilu allatigut sulisoqarnikkut patajaatsumik aalaakkaasumillu inissisimasoqarpoq. Sooq malunnaateqarnerusumik angusat pitsanngoriarsimannginnersut pillugu imaaliallaannaq inerniliinissaq ajornakusooraluartoq, Evelyn aamma Malik qularuteqanngillat angajoqqaat meeqqamik atuarnerannik tapersersuinerat peqataanerallu annertuppat, taava meeraq atuartuunermini angusarissaartutut misigisimalluni inerisarnissaminut periarfissarissaarluassasoq:
- Assersuutissanik peqarpugut 3. klassit arlallit alloriarfimmi misilitsinnerminni angajoqqaaminnit tapersersorneqarnerat malinnaaffigineqarnerallu qanoq pingaaruteqartiginersoq, taakkumi misilitsinnerminni angusarissaarluaqaat, tamatumalu saniatigut kommunip tungaanit tamaviaarutigineqarpoq angajoqqaat meeqqamik atuarneranni akuunerulernissaat anguniarlugu, ilaatigut atuarfimmi siulersuisut aalajangersinnaanermut pisinnaatitaaffii qaffassarneqarnikuullutik, maannali nalunaarusiaq tigummisarput takutitsivoq pisariaqartoq suli annertunerusumik iliuuseqartoqarnissaanut, Evelyn Frederiksen erseqqissaavoq.
Ukiuni arlalinni akuerineqarani atuanngitsoortarnerit annikillisarneqarnissaat immikkut ukkatarineqarpoq. Illoqarfinni meeqqat atuarfissa kisitsisaataanni takuneqarsinnaavoq nangittumik atuanngitsoortarnerit annikillisarneqarnissaat sulissutigineqartariaqartoq.
- Taamaattorli Atuarfik Kilaaseeqqami Maniitsumiittumi atuanngitsoortarnerit annikillisarneqarneranni iluatsittumik periuseqarsimapput, paarlattuanillu Sisimiuni atuanngitsoortarnerit annikillisarniarlugit suli tamaviaarutiginnittoqartoq. Qilalaarpugut Atuarfik Kilaaseeqqami iluatsittumik sulissutiginninneq qanoq ingerlanneqarnersoq pillugu sukumiinerusumik paasisaqarnissatsinnut, aamma siunissaq eqqarsaatigalugu kommunitsinni atuarfiit tungaannit akuerineqarani atuanngitsoortarnerit nungusarniarneqarnissaannut qanoq periaaseqarniarnersut paasisaqarnissatsinnut soorunami qilanaarpugut, borgmesteri Malik Berthelsen aamma ilinniartitaanermut ataatsimiititaliami siulittaasoq Evelyn Frederiksen isumaqatigiillutik oqarput.
Taamaattorli aamma pitsanngorsaanissamut suliassat iliuuseqartariaqarnermik ersersitsisut arlaqararaluartut, meeqqat atuarfiillu tanngassimaarutigisinnaasaannik ersersitsisoqarpoq.
Assersuutigiinnarlugu Kangerlussuarmi Qinnguata Atuarfiani danskimi, matematikkimi tuluttullu angusat nuna tamakkerlugu agguaqatigiissitsinermut sanilliullugu angusarissaarnerungaarput, taamatuttaaq Sisimiuni Nalunnguarfiup atuarfiani 3. klassemi atuartut kalaallisut, danskisut aammalu matematikkimi angusarissaarsimapput.
- Nalunngilarput nalunaarusiami paasissutissat ilai misilitsinnerpiami pisunik ersersitsisuusut, taamaattorli sakkussaalluarput kommunitsinni atuarfiit imminnut sanillersuussinnaanissaannut aammalu tamatuma saniatigut nuna tamakkerlugu angusanut sanillersuussinnaanissaannut sakkussaalluarlutik, taamaammat meeqqat atuarfiata suli ingerlalluarnerulernissaanut sakkussarissaarpugut uuttuisinnaallutalu, neriuutigaarpullu angajoqqaat meeqqanullu atuartunut qanigisaasut nalunaarusiaq isumassarsiorfigisinnaalluassagaat aammalu meerartaminnut atuartunut tapersersuinerminnut annertusaatigisinnaassagaat, tassami anguniartuagassaraarput meeqqat atuarfiat naammassineqartassasoq inuusuttuaqqat ilinnialernissamut sulilernissamulluunniit piareersimalluartutut inerisarluarsimanissaat qulakkiissallugu, Qeqqata Kommuniani meeqqat atuarfiinut ataatsimoorussamik pitsaassuseq pillugu nalunaarusiaq kommunalbestyrelsimit oqaluuserineqarnera naammassineqarmat borgmesteri Malik Berthelsen aammalu ilinniartitaanermut ataatsimiititaliami siulittaasoq Evelyn Frederiksen isumaqatigiillutik oqarput.
Nalunaarusiaq uani atuaruk