Sisimiuni meeqqat arfininngornerni atuartarnissaannut nassuiaat
2021-mi aggustip arfineq-aappaani atuarfinni marluusuni Minngortuunnguup Atuarfiani kiisalu Nalunnguarfiup Atuarfiani atualernissap sapaatip akunneranik, tassa aggustip 16-ianut kinguartinnissaanut politikkikkut aalajangiisoqarpoq. Tassunga atatillugu ukiup atuarfiusup atuarfinni marluusuni aasaanerani atuarunnaarnissamut sapaatip akunneranut sivitsuinissaq aamma aalajangiunneqarpoq. Tamanna Nakorsaaneqarfimmik isumasiueqatigiinnikkut pivoq. Matumani piffissami tassani Sisimiuni tuniluuffiusumit ilisimaneqanngitsumik coronamik tunillatsissimasut 22-unerat tunngavigineqarpoq, Sisimiunilu inuit 20-t sinnerlugit katersuunnginnissaannik killilersuisoqarluni.
Atualernissap kinguartinneqarnera kiisalu ukiup atuarfiusup sapaatip akunneranik sivitsorneqarnera ilinniartitsisorpassuarnit angajoqqaanillu, ernumasimasunit tigulluarneqarpoq.
Ilinniartitsisut annerpaamik sapaatit akunnerini 46-ni atasuinnarmik atuartitsisussaatitaammata, kommunimi allatut aaqqiissutissarsiortoqartariaqarsimavoq. Taamaattumillu kommuni ulluni 200-nik atuartussaatitaanermut inatsisitigut piumasaqaammik immikkut akuersissummik ilinniartitaanermut aqutsisoqarfimmut qinnuteqarpoq. Qinnuteqaat itigartitsissutigineqarpoq, arfininngornerit ullullu atuanngiffiusussanit, ullut atuarfiusussat 200-t piumasaqaataasut naammassiniarlugit ilanngussinissamut kommuni kaammattorneqarpoq.
Taamaattumillu tulliuttunut atuarfissanik ilasisoqarpoq:
Minngortuunnguup Atuarfia aamma Nalunnguarfiup Atuarfia: Arfininngorneq 27. November 2021, Arfininngorneq 18. December 2021, Pingasunngorneq 16. Februar 2022, Arfininngorneq 26. Februar 2022, Arfininngorneq 4. Juni 2022.
Ulluni taakkunani pilersaarutit ersarinnerusut atuarfiup intra-tigut angajoqqaanut nalunaarutigineqarumaarput.
Atuartunut, angajoqqaanut ilinniartitsisunullu arfinngornerni atuartitsinernik ilasineq nukillalaarnarsinnaasoq paasisinnaakutsoorparput. Neriuutigaarpulli, kommunitut inatsisinik malinninnissamik qulakkeerinissarput paasineqassasoq, aammalu Sisimiuni Coronap tuniluunnerata nutaajunerani aalajangiisimanerit kinguneri tigusariaqarneri paasineqarsinnaassasoq, atualernissap kinguartinnissaanut aalajangiipallannermut amerlanernit nuannaarutigineqarsimalluni.
Atuartunut, angajoqqaanut atuarfinnilu sulisunut juullisiorluarnissamik kissaassilluta.
Inussiarnersumik inuulluaqqusillunga
Else Finne
Sisimiuni Ilinniartitaanermut pisortaq