Imigassat aalakoornartortallit matoqqatinneqarallarnerat Qeqqata Kommuniani sivitsorneqarpoq
Naalakkersuisut maanna ilisimatitsipput imigassanik aalakoornartortalinnik tuniniaaneq sassaallertarnerlu pillugit killilersuutaagallartut, imerniartarfinni neriniartarfinnilu nal. 22:00 matusisarnermik nassataqartut sivivitsuisoqassasoq.
Qeqqata Kommunianit kissaatigineqarpoq Kommunimi imigassanik aalakoornartortalinnik tuniniaasarneq sassaalliisarnerlu nangittumik matoqqatinneqarallassasoq, 1. februar 2022 ilanngullugu atuuttussamik.
Tamanna tunngavigalugu Borgmesteri Malik Berthelsen (S) Naalakkersuisunut qinnuteqarpoq akuerineqarlunilu imigassanik aalakoornartortalinnik matoqqatitsigallarneq sivitsorneqassasoq, pingaartumik piffissami aggersumi ilaatigut aningaasarsisoqartussaallunilu feriepengenik agguaassisoqartussaammat. Borgmesterip Naalakkersuisunut qinnuteqaatini ilaatigut imatut tunngavilersorpaa:
- Tunngavilersuutigaarput pingaartumik akissarsiffiup nalaani imerniartarfiit matuneqarnerisa kingorna angerlarsimaffinni aalakoornartortalinnik ernguttoqarsinnaanera aarlerinarmat, tamatumalu malitsigisaanik angerlarsimaffinni eqqissiviilliornerit pisinnaanerat aarlerinarmat. Tamatuma saniatigut aamma Nunap immikkoortuani nakorsaanerup Kommunimut saaffiginnikuuvoq kissaateqarluni matusigallaqqaneq sivitsorneqassasoq.
Aningaasarsinerup feriepengesinerillu, imminni aalakoornartutortoqartillugu aarlerinartooorsiortitsipput angerlarsimaffinni nipiliornerit eqqissiviilliornerillu, persuttaannerit, sumi tamaani putumasut takussaaneri, kinguaassiutitigut atornerluinerit, imigassartorsimalluni biilerneri, ambulancit orniguttaqattaarneri aammalu imigassamik aalakoornartumik ernguttoqarnera pissutigalugu peqqinnissaqarfimmi ulapputaareersut qaavisigut immikkut suliassaalertartut eqqaassanngikkaanni eqqaamaneqassaaq piffissami matumani covid-19 nunatsinni sumiiffippassuarni sukkasoorujussuarmik tuniluummat:
- Pingaaruteqarpoq peqqinnissaqarfimmi sulisut suliassaminnik aallussisinnaanissaat pillugu periarfissiinissarput, tassami tuniluunneq annertoorujussuaq maannaqqissaaq pimmat, aamma kommunitsinni. Tassa imigassamik aalakoornartortalimmik Qeqqata Kommuniani matoqqatsitsigallarnerup sivitsorneqarnissaanik kissaat politikkikkut kissaataannaanngilaq. Matumanimi Kommunip tungaaniit peqqinnissaqarfik, matusigallaqqanerup sivitsorneqarnissaanik kissaateqartoq tusaaniassallugu salliunneqarpoq, taamatuttaaq nunatsinni politiit sinennerlugit Politimesterip nunatsinni matusigallarnissamik isumaliuteqaqqusilluni kaammattuuteqarnera aamma kommunip tungaanit tusaaniarneqarpoq, borgmester Malik Berthelsen (S) tunngavilersuivoq
Taamaalilluni Qeqqata Kommunianut tunngatillugu matoqqatitsigallarneq sivitsorneqarpoq marlunngorneq 1. februar 2022 ilanngullugu.
Borgmesteri Malik Berthelsen neriuppoq Qeqqata Kommuniani innuttaasunit paasineqarluarumaartoq.