Qeqqata Kommuniani Kommunalbestyrelsip Naalakkersuisunut allagaa ammasoq:
2013 aallartisimalaartorli Naalakkersuisut arlaleriarlutik nalunaaruteqartarput ilinniartoqarfiit imminnut attuumassuteqartut sineriammi sumiiffinni assigiinngitsuni katersorneqassasut. Tunngavilersuutigineqartarpoq ataatsimoortilernerisigut ilinniartoqarfiit nukittunerusumik aaqqissuussaalissasut, ataatsimoortitsinikkut aningaasartuutaasartut pitsaanerusumik aaqqissorneqarsinnaalissasut aammalu minnerunngitsumik ilinniartut ilinniarnerminni sunngiffimminnilu qaffasissumik pitsaassusilimmik ataatsimoorusseqatigiissinnaanerat anguneqassammat.
Kingullertigut 2017-mi Naalakkersuisut aalajangerput ilinniarfiit teknikkimut inuussutissarsiornermullu tunngassuteqartut ataatsimuulersinneqarnissaannik pilersaarutit piviusunngortinneqassasut, Naalakkersuisullu 2018-ip aallartinnerani naqissusiipput ilumut pilersaarutit aalajangiusimaneqassasut piviusunngortinneqarlutillu.
Naalakkersuisut taamatut nalunaaruteqartarnerat aallaavigalugu Qeqqata Kommunianit arlaleriarluta ilinniartoqarfiit inuussutissarsiornermut sammisut Sisimiuni ataatsimuulersinneqarnissaat tunngavigalugu piareersaalluta aallartittarpugut. Pingaartumik KTI-ip aamma Saviminilerinermik Ilinniarfiup Sisimiuni ataatsimuulersinneqarnissaat immikkut aallullutigu.
Saviminilerinermik ilinniarfiup Sisimiunut nuunneqarnissaa politikkikkut aalajangiunneqarmat soorunami nuannaarutigalutigulu isumalluarfiginikuuarput. Titartaasussatullu toqqarneqartut, titartaasartut KHR, Verkis aamma S&M ilinniarfiup ilusissaatut siunnersuutaat Sisimiuni KTI-p ilinniarfianut tulluarsarneqarsimasoq tusagassiuutitigut saqqummiunneqarmat sanaartorlugu aallartinneqarnissaa soorunami qilanaarisimagaluarparput.
Pakatsissutigisatsinnillu paasivarput nuunneqarnissaanik aalajangersimanerigaluaq annerusumik tunngavilersuutitaqanngitsumik innuttaasunullu oqaluttuarineqanngitsumik Naalakkersuisuniit unitsinneqarsimasoq.
Kommunit akornganni naligiinnginnerup annertusiartortup suli annertusiartuinnarnissaa Naalakkersuisut kissaatiginngikkunikku, kisianni aamma ilinniartitaanerit imminnut assingusut ataatsimoortinnerisigut inuiaqatigiinnut pissarsiassaq pitsaanerpaaq eqqarsaatigissagaanni, KTI-p Saviminilerinermillu ilinniarfiup ataatsimuulersinneqarnissaat Naalakkersuisut pingaartittariaqaraluarpaat.
Tassami KTI-p suliai Sanaartornermik Ilinniarfiup ataanut katersorneratigut, Saviminilerinermik Ilinniarfiup aamma Aatsitassarsiornermik Ilinniarfiup initai tulluarnerusumik atorneqarsinnaapput, soorlu assersuutigalugu svejserinermut atortut katersorneqarlutik, imaluunniit Aatsitassarsiornermik Ilinniarfiup maskinatai angisoorsuit mekanikerinngorniarluni ilinniarnermi atorneqarsinnaallutik.
Aammalu Kalaallit Nunaanni teknologimik ilinniartitaanerit tamaasa eqqarsaatigalugit ilisimasanik avatangiisinillu pitsaanerusunik pilersitsinissaq pingaarneq ilanngullugu nussuinissamut pitsaasunik amerlasuunik tunngavissiissagaluarpoq. Teknologimik ilinniartitsisut tamaasa sumiiffimmut ataatsimut katersorneqarpata, ilinniartitsisunut nukissanik assigiissaarnerinermik angusaqartoqarsinnaavoq, taamaalilluni ilinniartitsineq sumiiffimminni tulluarnerpaamik ingerlanneqarluni minnerunngitsumillu ilinniartitsisunut pikkorissartunullu ilinniartitseqqiinermik suliniutit pitsaanerit ingerlanneqassallutik. Soorlu Arctic DTU-mit aamma Maskinmesterskole København Sisimiuni assingusumik ilinniartitsinermik suliniutaanik suliatigut pitsaaqutaasunut tunngavilersorneqartut.
Nalornisitsineq tamanut pitsaasuunngimmat, Naalakkersuisut piaartumik innuttaasunut nassuiaatigisariaqaraluarpaat suliaq sooq unitsinneqarsimanersoq aammalu oqaluttuaralugu susoqarniarnersoq.
Eqqaamassavarpummi Nuummi Saviminilerinermik ilinniarfiup atuarfittaa ullutsinnut naleqqukkunnaarnikunini pissutigalugu qanorluunniit nutaamik taarserneqartussaareernera.
Soorunamilu neriuutigaarput ilinniarfiup nuunneqarnissaanik aalajangersimaneq kommunitsinnut annertuumik iluaqutaallunilu assigiinngitsutigut kivitseqataasussaammat Naalakkersuisuniit aalajangiusimaneqaannassasoq.
Qeqqata Kommuniani kommunalbestyrelsemi gruppit siulittaasui borgmesterilu ataatsimoorlutik taamatut Naalakkersuisunut kaammattuuteqarput.
Evelyn Frederiksen, Siumut
Juliane Enoksen, IA
Siverth K. Heilmann, Atassut
Abel Enoksen, Naleraq
Borgmesteri Malik Berthelsen, Siumut