Arctic Circle Business Qeqqata Kommunialu webinareqartitsivoq Kangerlussuup eqqaani ilisimatuutut misissuinerni periarfissat pillugit januarip 25-iani. Misissueqqissaarnerup takutippaa sila pillugu ilisimatusarneq annertusigaluttuinnassasoq aamma ilisimatusartut nunanit allamiut Kangerlussuarmi ilisimatuutut misissuinissamut periarfissat nalugaat.
Webinar ’Kangerlussuaq Science Workshop’ nunanit assigiinngitsunit 10-nit peqataaffigineqarpoq nunavissuarnit sisamaneersunit aamma 50-it sinnerlugit peqataaffigineqarpoq, taakkunannga ilisimatuut aamma issittumi ilisimatusartut ataqatigiissaarisui amerlapput, taakku nunani allani issittumi ilisimatusarfiit angisuuneersuupput.
Tunngaviusumik misissuineq pitsanngorsarneqarpoq
Webinarimi Thomas Ingeman-Nielsen Arctic DTU-meersoq oqallisissiamik saqqummiivoq Kangerlussuup Sisimiullu akornanni nunap qeriuaannartoq pillugu ilisimatusarnermik nutaamik imalimmik. ATV-p aqquserngata nutaap aamma aqqusinissap sinaatigut uuttuutinik ikkussuisoqassaaq, taakku ukiuni tulliuttuni silaannaap allanngoriartornerata nunamut qeriuaannartumut nunap timaanit aamma Kangerlussuup eqqaani sermersuarmit sinerissamut aamma Sisimiut eqqaanni Davidsstrædetimut sunniutai uuttortassavaat.
Nunanit allanit ilisimatuut Internationale Arktiske Hubimut (Arctic Hub) nutaamut isumalluaqaat. Allaffeqarfiup pisortaa, Anna-Sofie Skjervedal oqallisissiamik saqqummiivoq oqarlunilu: Arctic Hub Kalaallit Nunaanni aamma eqqaani misissuinernut qitiuvoq. Taamaattumik workshopimut peqataanerput nuannaarutigaarput, aamma oqaluttuaralugu misissuinerup silarsuaani peqataasut Kalaallit Nunaannut iserfittut atorsinnaagaatigut. Workshopimi peqataasut ilanngussaat pitsaasut maluginiarpagut. Assersuutigalugu misissuinermi atortulersuutinik aamma ingerlasussanik piareersaaneq aqutsinerlu pillugit qanoq peqartigisoqarnerata paasinissaa pisariaqartinneqarpoq. Massakkorpiaq Kalaallit Nunaanukarluni misissuiniaraanni piumasaqaatit malittarisassallu suunersut ilaatigut katersorpagut, taava ilisimatuut ataasiakkaat ajornannginnerusumik tamakkerlugu isiginnissinnaalissapput paasissutissarlu naleqquttoq nassaaralugu.”
Ilisimatuunut namminersorlutik inuussutissarsiortunut neqeroorutit nutaat
Arctic Circle Businessip nittartagaq nutaaq saqqummiutereerpaa, www.scienceservices.gl, Kangerlussuup eqqaani misissuinissamut periarfissat pilerisaarutigalugit. Webinarimi Kangerlussuarmiut suliffiutaat suliniutitik oqaluttuaraat, tassunga ilaallutik illut nutaat marluk ilisimatuunut assigiinngitsunik sullissinissamut neqeroorutinik ukkataqartut, assersuutigalugu unnuinermik, laboratorianik, biilinik attartortitsineq, atortussanik quersuarmillu neqeroortut.
Arctic Circle Business’ pisortaanera, Jesper Schrøder, oqaaseqarpoq: ”Ilisimatuut nunanit allaneersut tamaanimiut suliffeqarfiinik atorluaanissaat qulakkeerusupparput tamanut iluaqutaammat.”
Attaveqaatinik atortulersuutinillu ineriartortitsineq
Qeqqata Kommuniata oqaluttuaraa Kangerlussuarmit sermersuarmut aqquserngup nutarterneqarnera, Kangerlussuup Sisimiullu akornanni ATV-mik aqquserniorneq kiisalu nunaqarfiup kusassarnissaanut suliniutit ingerlasut, ilaatigut ilaalluni eqqagassalerinermi suliniutit nutaat Namminerlutik Oqartussat, ESANI aamma kommuni suleqatigiilluarlutik ingerlataat
Qeqqata Kommuniani suliniutit pisortaat, Laust Løgstrup, oqaaseqarpoq: ”Malunnarluarpoq ilisimatuutut misissuisartut Kangerlussuarmi attaveqaatinik atortulersuutinillu amerlasuunik suliniuteqarneq tupigusuutigigaat. Tusarsimanngilaat Kangerlussuarmi mittarfiup nutarterneqarnissaa aamma mittarfik nunami takinerpaajuaannassasoq aamma miffigissallugu isumannaannarpaajuassasoq kiisalu Oxford Global Projectsip Kangerlussuup Sisimiullu akornanni aqqusinniornissaq kajumissaarutigisimagaa.”
Kangerlussuarmi ilisimatuutut misissuineq pillugu
Atuagassiaq ataqqisaalluartoq ukiumut saqqummersartoq ‘Arctic, Antarctic and Alpine Research’ nalliuttorsiorluni saqqummersitaa nummer 50 Kangerlussuarmut pigitippaa, ”Kangerlussuup eqqaani sermersuup sinaava nunarsuarmi sermersiuunit pinngortitami pissuseqatigiit ataqatigiinnerannik misissorneqarnerpaajugunarmat” aamma ”Kangerlussuup eqqaa issittumi nunap isikkuata allanngoriartortup misissorneranut sinniisuummat.” Kangerlussuarmi misissuinissamut soqutiginninnerujussuup nunaqarfiup ineriartornera ingerlateqqissavaa. Kangerlussuaq peqataasut ilaannit tamaani misissuisunik unnersiutigineqarpoq tassaaneragaalluni sermimik sermersuarmillu misissuinermi sumiiffik pitsaanerpaaq.