Qeqqata Kommuniani pisortaaneq Juliane Henningsen Heilmann erseqqissaavoq aningaasatigut sipaarutaasussat immaqa annertugisassaanngikkaluartut, taamaattoq pinngortitap paarilluarnissaanut iliuuseqaqataaneq matumani qitiutinneqartoq:
- Kommunitta eqqiluitsuutinnissaanik pingaartitsinerput qallikkuinnaq takussutissiissutaassanngilaq. Illoqarfittagut nunaqarfittagullu eqqiluitsuutikkusullugit siuarsaanerput naammanngilaq, aammali timitalimmik iliuuseqarsinnaaffitsigut tamanut ersinngikkaluarpataluunniit iliuuseqartarnissarput pingaaruteqarpoq. Maluginiarneqassaarmi pisortat allaffeqarfissuini allaffeqarfiinilu minnerni eqqaaviit puussiartaat plastikkiusut, amerlasuutigut immerluarneqarnikuunngitsulluunniit, ullut tamarluinnaasa taarsersorneqartarmata, uffa nalunatigu pinngortitaq plastikkilu imminnut naapertuutinngitsut. Taamaammat eqqagassat isugutattut ataatsimut eqqaavilerlugit sulisut allaffimminni eqqaavii pappiaqqanut eqqagassanullu panertunut allanut taamaallaat atugassanngortippagut, neruiuppugullu pisortat ingerlatsiveqarfii allat uagutsitulli allorioriarusulerumaartut, iliuutsimmi annikitsunnguilluunniit ataatsimoorukkaanni sorujussuanngortarput, Qeqqata Kommuniani pisortaaneq Juliane Heningsen Heilmann nassuiaavoq.
Qeqqata Kommuniata iliuusaa FN-imi piujuartitsiviusumik ineriartortitsinermut nunarsuarmi siunnerfiit ilaannut, tassalu pinngortitap sinaannaallu paarilluarnerisigut inuunerissaarnissamik uumassusillillu paarilluarnissaannik siunertaqartunut anguniakkanut naapertuuppoq.
Borgmester Malik Berthelsen (S) naammagisimaarinnilluarpoq pinngortitamik paarsilluarnissamik politikkikkut kissaateqarneq allaffissornikkut suliaqartunit timitalimmik malitseqartinneqarmat:
- Nunatsinni innuttaasuusugut pinngortitamik annertuumik atuisuuvugut, imaani nunamilu uumasut peqqumaatissatsinnik aallerfigisarpagut, sulilu ukiorpassuit taamatut periarfissaqarusukkutta minnerunngitsumillu kinguaassagut uagutsitulli pinngortitamik atuisinnaanissaminnut periarfissinneqarluassappata, ullumikkut iliuuserisinnaasagut iliuuserisariaqarpagut, borgmester Malik Berthelsen (S) Kommunip allaffissornikkut sulisuisa iliuusaannut tapersiilluni oqarpoq.
Qeqqata Kommuniata allaffinni plastikkinik atuiunnaarnera aamma nuna tamakkerlugu naalakkersuinikkut plastikkinik atuinerup annikillisinnissaanut pilersaarummut naapertuuppoq, Qeqqata Kommunianillu neriuutigineqarpoq suliniut Namminersorlutik Oqartussat kommunillu akornanni ataatsimoorullugu ersarissumik malunnaatilimmillu ataavartumik ingerlanneqassasoq.
Eqqaaviit plastikkimik puussiartallit eqqagassanut masattunut atugassat Qeqqata Kommuniata allaffeqarfiini ataasiakkaaginnanngornikuupput.