Kitaani nuna eqqissisimatitaq nutaaq pillugu innuttaasunik ataatsimiisitsineq

"mittarfiit nutaat malitsigisaannik siunissami takornarissanik amerlanerusunik Kalaallit Nunaannut tikittoqartalertussaanera aammalu takornarissat nunamut tamarmut siammarneqarnissaat pillugit suleqatigiittussaanitsinnik, borgmesterit siunnersuutaat isigineqassaaq" Ane Hansen oqarpoq.

Malik Berthelsen ilassusiivoq "Namminersorlutik Oqartussat nuna tamakkerlugu takusassaqqissuusutut takornarianullu sullissivittut suliaannut kiisalu Kitaani nuna eqqissisimatitamut nutaamut siunnersuutitsitut takornarissanut orniginartut amerlanerusut pisariaqartippagut".

Kitaani nuna eqqissisimatitaq nutaaq pillugu annertuumik soqutiginninneq
Kommunalbestyrelsit marluusut 2020-mili aalajangiipput, Kitaani nunamik eqqissisimatitamik nutaamik suliaqarnissamut periarfissanik misissuisoqassasoq. Taamanimiilli kommuninit marluusunit, Avatangiisinut naalakkersuisoqarfimmit, Pinngortitaleriffimmit, WILD Nature Foundationimit peqataaffigineqartumik suleqatigiissitaq periarfissanik misissuinikuuvoq.
Nunat amerlasuut amerliartortullu nunanik eqqissisimatitaqarfeqarput, taamaalilluni ingerlanermi USA aamma EU akulerutsinneqarnikuupput aammalu suliniaqqinnissami tunniussaqarusullutik.

Ane Hansen naqissusiivoq "nunamik eqqissisimatitamik siunnersuut annertussusaalu pillugit innuttaasut qanoq isumaqarnerat tusarneqaqqaassasut".

Malik Berthelsen erseqqissaavoq "Kalaallit Nunaanni nuna eqqissisimatitaq kisiartaagallartoq nunarsuullu sinnerani nunat eqqissisimatitat allat assigalugit, nunami eqqissisimatitami suli piniartoqarsinnaassasoq".

Ane Hansen naqissusiivoq ”innuttatsinnut qangatuulli piniarnermut nunap immikkoortuani piniartarfiit paariinnarneqarnissaat, soorluttaaq sumiiffimmi najugallit suli nunami eqqissisimatitami pinngortitami angalasarsinnaanissaat, uagutsinnut pingaaruteqartorujussuuvoq".


Innuttaasunik ataatsimiititsinerit
Innuttaasunik ataatsimiititsinissat 2020-2021-mi ingerlattussanngorlugit pilersaarutaanikuupput, covid-19-imilli unammillernartoqarnera pissutigalugu 2022-mut kinguartinneqartariaqarsimallutik, massakkullu ukunani ingerlanneqassallutik:

• Kangerlussuaq: sisamanngorneq 2. juni nal. 19.30 Illu tamatigoortumi
• Sisimiut: arfininngorneq 4. juni nal. 14.00 Taseralimmi
• Attu: pingasunngorneq 8. juni nal. 16:00 Katersortarfimmi
• Kangaatsiaq: pingasunngorneq 8. juni nal. 19.30 Katersortarfimmi
• Niaqornaarsuk: sisamanngorneq 9. juni nal. 16:00 Katersortarfimmi
• Aasiaat: sisamanngorneq 9. juni nal. 19:30 Sømandshjemmemi