Qinikkatullu innuttaasut aningaasaataasa ukiumut 800 mio.kr. -inik annertussuseqartut aqunnissaannik pisussaaffilerneqarsimasugut, akisussassusilimmik ingerlatsinissarput pisussaaffigaarput.
Qeqqata Kommunia ukiuni kingullerni ullumikkullu qujanartumik aningaasaqarnikkut pitsaasumik inissisimasimavoq. Ernumanartumilli ingerlatsinermut aningaasartuutigut isertitatsinniit sukkanerujussuarmik qaffakkiartortut takusinnaavarput, allaat Namminersorlutik Oqartussat nunatsinni akit akissarsiallu qaffakkiartornissaannik naatsorsuutigisaannik qaffasinngerungaatsiartumik. Tamatumalu qanoq iliuuseqartariaqalersippaatigut. Tassami taamatut ingerlaannartoqassappat aningaasaqarnikkut ajornartorsiulertussaavugut, allaat suliniutinut nutaanut sanaartugassanulluunniit atorsinnaasagut aningaasat nunguttussaallutik. Tassami ingerlatsinermut aningaasartuutigut 2020-miit 2021-mut ukiup ataatsip ingerlaneriinnaani 46mio.kr-inik qaffariaateqarsimapput, taakkunannga akissarsianut aningaasartuutit 25 mio.kr. -inik qaffariaateqarsimallutik. Ukiumilu tassani isertitagut katillugit taamaallaat 3 mio.kr. -inik qaffariaateqarsimapput, 2019-mut sanilliullugit 2.mio.kr.-inik ikinnerullutik. Tassuunakkut takuneqarsinnaavoq aningaasartuutigut isertitaniit sukkanerujussuarmik qaffakkiartortut. Taamaattumik ingerlatsinermut aningaasartuutitta 2.5%-imik, aningaasanngorlugu ukiumut 19 mio.kr. -nik appartinnissaat avaqqunneqarsinnaanngilaq.
Ilisimavara kikkut tamarmik sulisut amerlanerusariaqaraluarnerannik kissaateqarnerat, akissaqaraluaruttalu taamaakkusunnaraluaqaaq. Ajoraluartumilli pissutsit piviusut taamak ajornanngitsiginngillat.
Isumaqarpungalu ingerlatsinermut aningaasartuutit sanaartornermullu aningaasartuutit immikkoortinnissaat erseqqissassallugu pingaaruteqartoq. Tassami ingerlatsinermut aningaasartuutit qaffanneri tamaasa, soorlu sulisut amerlineqarneri isumaqartarpoq, sanaartugassanut suliniutinulluunniit nutaanut, soorlu nutaanik inissialiornernut, meeqqeriviit nutaanngilisut nutaanik taarsernissaannut, sunngiffimmi sammisassat pitsanngorsarnissaannut, ineriartortitsinernulluunniit atorsinnaasagut tamatigut ikilisarmata.
Maluginiartarparalu ineriartortitsiniarnermut, soorlu aqqusinermut aningaasaliisimanerput ilaatigut uparuartuutigineqartartoq aqqusinermut aningaasat atornagit sulisut amerlineqarnissaannut atorneqarsimasariaqaraluartut. Sulisut suliffeqarfiutitta ilaanni amerlanerusariaqaraluarnerat tunngaviatigut isumaqatigigaluarlugu, oqaatigissavara aningaasaatigut tamaasa ingerlatsinermut atortalissagutsigit taava kommunitut ineriartortitsinermut akissaarutissaagatta. Ineriartortitsinermummi aningaasaliisanngikkutta kommunitut unittuussaagut naggataatigullu innuttaasut taaqqoraluttuinnassallutik, tamannalu kommunalbestyrelsemi soorunami kissaatiginngilarput. Uanga nammineq borgmesteritut minnerunngitsumillu innuttaaqataasutut kommunimi ineriartortitserusuttumi pisoqarfiusumilu najugaqarusuppunga. Soorunami innuttaasunik naammaginartumik atugassaqartitsinissaminik aamma neqerooruteqartumi.
Taamaattumik nuannaarutigaara ingerlatsinermut aningaasartuutit qaffakkiartuinnarnerisa qanoq iliuuseqarfigineqarnissaat kommunalbestyrelsemi partiit tamarmik isumaqatigiissutigimmatigit. Upperaaralu ingerlatsinermut aningaasartuutit missingersuutit iluanni ingerlanneqarsinnaappata sulisinnaasullu tamarmik, ingammik inuusuttut tamarmik pilersueqataallutik suleqataappata ilinniagaqarpataluunniit kommunerput ineriartornermut pitsaasumik suli siunissami peqataassasoq. Tassami sulisinnaassusilittut ukiullit qujanartumik meerartatsinnik utoqqartatsinnillu pilersuisinnaasut suli amerlanerussuteqarlutik inissisimapput.
Malik Berthelsen, Borgmesteri.