2019-imi angajoqqaat akisussaanerat pillugu Qeqqata Kommunia, angajoqqaat akornanni misissuititsinikuuvoq, misissuinerullu ilaatigut takutippaa akissuteqartut 65 procentiinit meerarisamut killiliisinnaaneq unammillernartinneqartoq. Tamanna tunuliaqutaralugu suleqatigiissitaq Maniitsumi, Sisimiuni, kommunillu nunaqarfiini innuttaasunik ataatsimiititsinikuuvoq, tassani ilaatigut qaratsap ineriartortarneranut tunngassutilimmik, meeqqat angajoqqaallu akornanni attaveqarnerup pingaaruteqassusaa kiisalu, killiliisarneq pillugu saqqummiisoqarnikuulluni. Innuttaasunik ataatsimiisitsinerni pingaarnertut siunertaanikuuvoq sammisat pillugit angajoqqaanut ilisimasassanik ingerlatitseqqiineq, meeqqanillu akisussaassusilimmik silatusaartumik killiliisarneq pillugu oqallinnermik pilersitsinissaq. Peqataasut amerlasuut isumaqarput innuttaasunik ataatsimiisitsinerit maqaasisaasimasut aaqqissuussanillu taamaattunik amerlanerusunik ujartuisoqarluni, taamaattumik suleqatigiissitaq 2, 2021-mi innuttaasunik ataatsimiisitsinernik amerlanerusunik pilersaarusiornikuugaluarpoq, ajoraluartumilli corona peqqutaalluni unitsinneqartunik. Suleqatigiissitaq 2 2022-mi innuttaasunut taama assingusunik aaqqissuussinissaq pillugu pilersaaruteqarpoq, tamatumani pilersaarut Maniitsumi, Sisimiuni kommunillu nunaqarfiini angajoqqaat akornanni saqqummiinermik, oqallitsitsinermik, aliikkusersornermik ataqatigiinnermillu imaqarumaarluni.
Suleqatigiissitap suliniutaasa ilaat tassaavoq, innuttaasunik ataatsimiisitsinermi sammineqartut pillugit oqariartuutinik assigiinngitsunik imalinnik filmeeqqanik suliaqarnissaq, tassunga ilanngullugu meeqqap angajoqqaallu akornanni attaveqarnerup pingaaruteqassusia, angajoqqaat meeqqallu meeqqeriviata akornanni suleqatigiinnerup pingaaruteqassusia, kiisalu nammineq meerarisamut killiliisinnaanerup pingaaruteqassusia. Filmeeqqanik saqqummersitsinerup siunertaa tassaavoq angajoqqaat innuttaasunik ataatsimiisitsinernut takkunnissamut periarfissaqanngitsut nukissaqanngitsulluunniit anguneqarnissaat suleqatigiissitallu neriuutigivaa, angajoqqaat meeqqamut pitsaasunik, aalajangersimasunillu sinnaakkutinik pilersitsinissamut ilisimasassanik iluaqutissarsiumaartut.
Suleqatigiissitaq 2-p nuannaarutigalugu nalunaaarutiginiarpaa meeqqamut ersarissunik sinaakkusiisinnanerup pingaaruteqassusia pillugu filmeeqqat siullit marluk kommunip nittartagaani facebookimilu quppernerani tamanit takuneqarsinnaanngormata.
Neriuppugut filmeeqqani ullumi saqqummersuni aamma ukiup ingerlanerani saqqummertussani oqariartuutit innuttaasunit tigulluarneqarumaartut.
Filmiaqqat Qeqqata Kommuniata facebookimi qupperneranut iserlutit takukkit.
Annertunerusumik paasisaqarusukkuit uku attavigikkit:
Mette B. Berthelsen – Qeqqata Kommuniani Atuilluartuunissamut siunnersorti
mbbe@qeqqata.gl +299 86 73 46
|
Qeqqata Kommuniata suliniutaa "Inuunerissaaneq - det gode liv”, akimortunik suleqatigiissitanik arfineq-marlunnik peqarpoq, taakku meeqqat pisinnaatitaaffiinik suliaqarfimmit innersuussutinik atuutsitsilernissamik, utoqqaat inuunerissaarnerisa paariinnarneqarnissaanik, innuttasut innarluutillit innuttaasut allat assigalugit nalilimmik inuuneqarnissaannik ujartuisuupput. Suliniutit pillugit uani atuagaqarit www.qeqqata.gl . |
|
Suleqatigiissitami 2-mi ilaasortat Qeqqata Kommuniata suliffeqarfiutaanni assigiinngitsuni ulluinnarni suliffeqarput, taakkununnga ilaallutik meeraaqqeriviit / meeqqeriviit, meeqqat atuarfii, ilinniartut ineqarfii, MISI, ilaqutariinnik kiffartuussivik, ilinniartitaanermut immikkoortortaq pisortaanerullu sulisoqarfia. Suleqatigiissitami ilaasortat immikkoortuni assigiinngitsuni atuuffeqarnertik ilinniagaqarnikkullu tunuliaqutaqarnertik aallaavigalugu pitsaasunik misilittagaqarlutillu ilisimasaqarput, suleqatigiissitap suliniutinik atuutsitsilernermini iluaqutigilluartagaanik. |