Carl Christian Olsen, Puju innersuunneqartunit quliusunit toqqarneqarpoq, toqqarneqarneranullu Ilinniartitaanermut Ataatsimiititaliami Siulittaasoq Evelyn Mølgaardip oqalugiarnermini tunngavilersuutigai nittarsaassisuulersup kulturitoqqatsinnik, oqaatsitsinnik aammalu inuit pisinnaatitaaffiinik ilisimasaqarluartuunera sunniuteqarluartumillu suliaqarsinnaanera aalajangiisooqataasimasut, taamatullu oqaatigalugu inuusuttunut sunniuteqarluarnissaa ilisimasallu nutaqqanillu pigiliunneqarnissaat pingaaruteqartoq.
Evelyn Mølgaardip ilaatigut oqalugiarnermini nittarsaassisuulersoq pillugu oqaatigaa:
”Qangarsuaaniit inuit Qeqqata Kommuniani inuusimasut anersaakkut inuuneq timikkullu atugassaqarneq immikkoortikkuminaatsippaat. Naak ullutsinni inuuneq qangarsuaaniit allaanerugaluaqisoq, inuit maani inuusimasut avatangiisiminnut tulluarsarnermikkut, avatangiisinut ammasuunermikkut, ineriartornermikkut minnerunngitsumillu avatangiisimik pitsaaqutaannik atorluaanermikkut inooriaaseq tammatsaalivaat.
Nittarsaassisutut toqqarneqartup siuliani eqqaasannut kulturikkut ineriartortitsisimanermut suliniuteqarsimasuuvoq. Annertuumik Inuit Issittormiut kulturikkut, kinaassutsikullu akuerisaanissaat suliniuteqarfigeqataaffigisimallugu, inuit pisinnaatitaafiinnik ataqqinninnissaq minnerunngitsumillu kalaallit oqaatitsinnik annertuumik suliaqarsimasuulluni.”
Kulturimik nittarsaassisumik ivertitsineq Sisimiut Katersugaasiviata illuutaasa ilaanni, Bethelip Oqaluffiani ullukinnermi malunnartitsineq ingerlanneqarpoq, ini juullerpalaartoq iserfigalugu alianaalluni, inugasaarluni kikkunnut tamanut ammalluni.
Ivertitsineq Ilinniartitsitaanermut Ataatsimiititaliami siulittaasup nittarsaassisunngortullu oqalugiarneri pereermata, erinnanik akunniliisoqartarlunilu isersimasut kalaaliminernik sassaallerfigineqarput, oqaaseqartussanullu allanut periarfissiisoqarluni.
Carl Christian Olsenip pania Nunni Navaranaaq Olsen ivertitsinermi peqataasoq angunni oqalugiarfigaa, ilaatigut oqaatigalugu oqaatsinik pingaartitsineq nammineq angumminit pigiliussani qujamasuutigalugu, aamma perorsarmatik oqaatsinik kukkusumik atuinermi naqqitsinneq annernanngitsuusoq.
Inuit Issittormiut Siunnersuisoqatigiivisa ICC-p siulittaasua Sara Olsvig Internetikkut oqalugiarpoq, ilaatigut Qeqqata Kommunia pilluaqqungaarlugu taama annertutigisumik siammasitsigisumillu ilisimatusarnikkut, oqaluttuarisaanikkut, inuusaatsikkut, kulturikkut allarpassuartigullu ilisimasaqartigisumik nittarsaassisoqalermat.
Erinarsoqatigiit Crescendop aamma meeqqat erinarsoqatigiivisa erinnat marluk atorpaat, Juullimi Qiimasuttut aamma Mary Did You Know aammalu Otto Rosingimip atuakkiaanit Kulunnguaq-mit tigulaarinnilluni aassuutit ullukinnerlu pillugit atuffassisoqarluni.
Ullukinnersiornermi ivertitsinermilu kalaalimernit, kaffi/ tii kalaallillu kaagiat sassaalliutigineqarput.
Qeqqata Kommuniani Kulturimik Nittarsaassisuussaaq 21. juni 2024-ip tungaanut
Saaffissaq:
Ilinniartitaanermut Ataatsimiititaliami siulittaasoq
Evelyn Mølgaard
Mobil: +299525955