Meeqqat inuusuttullu peqqinnerat, ataatsimoornerat eqeersimaarnerat peqataatitsinerillu nukittorsarniarlugit, Qeqqata Kommuniani atuilluartuunissamik aningaasaateqarfimmiit sammisaqassutissaannik agguaanneqarput.
Arsat, pinnguaatit, titartaatit, allallu aalassutaallutik sammisaqassutaasinnaasut karsip iluaniipput.
- Meeqqeriviit atuarfiillu eqeersimaartumik avatangiiseqarnissaat pingaartipparput, taamaattumillu sammisaqarnermi atortussanik tunerusullugit, Atuilluartuunissamik suliniutinut siunnersorti Apollonie Kreutzmann oqarpoq.
Sammisaqarnermut atortut agguaanneqartut meeqqat meeqqerivimmiinnermini atuarfimmiinnerminnillu inimi silamiluunniit atorsinnaavaat. Tassani meeqqat nammineerlutik inersimasumilluunniit peqateqarlutik isumassarsiorlutik pinnguaatit allanngorartillugit atorsinnaavaat.
- Tatiginerulerneq, nuannaarnerulerneq, alloriarsinnaaneq allanillu suleqateqarsinnaaneq ilinniartarpaat. Meeqqat takorluuisinnaassusaat atorluarlugu pinnguartassapput, suliniutinut siunnersorti Apollonie Kreutzmann oqarpoq.
Sammisaqassutissat assigiinngitsunik imallit, Qeqqata Kommuniani meeqqeriviit atuarfiillu tamarmik maanna tuniorarneqaleruttorput, ilaalu nassiussorneqaleruttorlutik.
- Neriuutigaarput sammisaqarnermi pinnguaatit atorluarneqarumaartut. Pisariaqartinneqarpat kommunimi suliniutinut siunnersorti saaffigineqarsinnaavoq, sulisut isumassarsianik tunineqassappata, Apollonie Kreutzmann naggasiivoq.