Tusagassiorfitsigut paasivara, Qallunaat Naalakkersuisuinut aamma Naalakkersuisunut sinniisut sapaatip akunnerani matumani Kangerlussuup siunissaa eqqartorsimagaat aammalu paasisaqarnissaq nukinginnanngitsoq inerniliunneqarsimasoq. Quarsaarpunga.
Inatsisartut Mittarfissanut siunnersuut 2018-imi akuersissutigimmassulli maannakkut Kangerlussuarmi Qeqqata Kommunianilu innuttasut inuussutissarsiuteqartullu nalornissuteqarlutik inuupput. Siunnersuut kingornatigut Naalagaaffiup/Qallunaat Naalakkersuisuisa aamma Namminersorlutik Oqartussat/Naalakkersuisut ataatsimoorlutik aningaasalersornissaannik isumaqatigiissutigisaat - malugalugu Kangerlussuup siunissaa paasinngikkaluarlugu.
Kangerlussuarmi Qeqqata Kommunianilu innuttaasut inuussutissarsiuteqartullu 2019-imi siunissamut neriuuteqaleraluarput, Qallunaat Naalakkersuisuisa Naalakkersuisullu Kangerlussuarmi Mittarfimmik atuiinnarnissaq pillugu tunngaviusumik isumaqatigiissuteqarmata. Taamaattorli pakatsinartorujussuuvoq, tunngaviusumik isumaqatigiissut taanna ukiut sisamat kingorna isumaqatigiissutivimmik inerneqanngimmat, taamaalillutik Kangerlussuarmi Qeqqata Kommunianilu innuttaasut inuussutissarsiuteqartullu sinaakkutissanut piumasaqaatit ilisimassagaluarlugit taamaaliornikkullu siunissamut pilersaarusiorsinnaallutik aningaasaliisinnaallutillu. Innuttaasut nunallu immikkoortua oqartussaaqataassusilimmik inuiaqatigiinni atugarissaartuni taamatut pissallugit akuersaarneqarsinnaanngilluinnarpoq.
Qallunaat Naalakkersuisuisa Illersornissaqarfillu Kangerlussuarmi periarfissat takusinnaammatigit ullullu ilaanni attuumassuteqalerpat mittarfimmik nutarsaanissamut piareersimammata nuannaarutigaara. Aammattaaq nuannaarutigaara, Illersornissaqarfik Kangerlussuarmi upalungaarsimanermut ilinniarfimmik aallarnisaaniarmat. Timmisartunik nakkutilliissutinik /qulimiguulinnik/dronenik Kangerlussuarmi Mittarfissamik pilersitsinissaq aammattaaq tapersersorpara. Issittumi nunatani Kalaallit Nunaata nunataa nunat pissaanilissuit nalunagu nakkutigineqaratik suliaqarfigiinnarsinnaasaattut inissisimaannannginnissaa pingaaruteqarpoq.
Kalaallit Nunaanni attaveqaasersuutitigut Namminersorlutik Oqartussat Naalakkersuisullu aningaasaliinerat nuannaarutigivara. Erngup nukinga atorlugu nukissiuuteqarneq takornariaqarnerlu ilanngullugit aalisarnerup saniatigut inuussutissarsiornikkut immikkoortortat arlallit iliuuseqarfigineqarnerat isumaqatigaara. Kalaallit Nunaannik ineriartortitsinermut namminerlu napatittumik aningaasaqalernissamut pingaaruteqarpoq. Taamaattorli Namminersorlutik Oqartussat aningaasaliineri aammattaaq nunap immikkoortuini erngup nukinganik nukissiornissamut nunamilu takornariaqarnikkut periarfissat annersaaffigisaanni aammattaaq pisarnissaat - aammalu Namminersorlutik Oqartussat nunap immikkoortuani attavilersuutinik aningaasaliinissaq Qallunaat Naalakkersuisuinut/Illersornissaqarfimmut, Qeqqata Kommunianut nunanilu allani inuussutissarsiutaatilinnut tunniutiinnassanngikkaa pingaaruteqarpoq.
Qallunaat Naalakkersuisui Naalakkersuisullu Nuummi Københavnimiluunniit Kangerlussuup siunissaata eqqartornera taamaatissagaat kaammattorniarpakka, kisianni Kangerlussuup Mittarfia pillugu isumaqatigiissumik atsiorniarlutik Kangerlssuarmukassasut, isumaqatigiissutaasullu imarisaa pillugu innuttaasut inuussutissarsiuteqartullu paasissutissiiffigalugit.
Tunngaviusumik isumaqatigiissutip atsiorneqarneraniit siuariarfiunngitsumiik ukiut sisamat ingerlareermata, isumaqatiginninniarnerni Qeqqata Kommuniata ilanngutsinneqarnissaanut piffissanngorpoq. Matumuuna Qallunaat Naalakkersuisui Naalakkersuisullu sapinngisamik piaartumik Kangerlussuarmut qaaqquakka. Soorlu nuannaralugu oqaatigineqartartoq: "Uagut peqataatinnata uagut pilluta eqqartuisoqassanngilaq".
Malik Berthelsen, Borgmesteri.