Meeqqat atuarfiisa pitsaassusaat pillugu nalunaarummik ukiut tamaasa oktobarip aallaqqataa nallertinnagu kommunalbestyrelsimut tunniussisoqartarpoq. Nalunaarutillu kingulliup takutippaa meeqqat 3. klassimi 7. klassimilu alloriarfinni siorna misilitsinneri siornaammut sanilliullugu qaffariarsimasut.
Atuarfik Kilaaseeqqami atuartut ingerlalluartut
Atuarfik Kilaaseeqqami 3. klassit tamarmik 7. klassillu tamarmik misilitsinnerminni angusaat tamarmik qaffariarsimapput.
Nalunaarusiami erserpoq atuartitsissutini kalaallisut, qallunaatut, kisitsineq kiisalu tuluttut, 3. klassimi 7. klassimilu atuartut tamarmik angusaat qaffariarsimasoq.
Atuarfik Kilaaseeqqami atuartitsissutini klassinilu alloriarfinni tamani siorna inernerit amerlanerit siornaammut sanilliullugit qaffasinnerupput. Klassinilu kalaallisut atuartitsissummi nunarput tamaat sanilliullugu angusarissaarnerusut, nalunaarusiami atuarneqarsinnaavoq.
Kiisalu 3. klassini atuartut qallunaatut angusaat qaffasinnerusut inernerit takutippaat. 7. klassimili alloriarfinni misilitsinnermi inernerit takutippaat klassimi marluusuni tuluttut atuartitsissutini angusat appasinnerulaartut, nunarput tamaat agguaqatigiisillugu sanilliutissagaanni.
Atuarfiit allat aamma ingerlalluarput
Minngortuunnguup Atuarfiani siorna angusat tamarmik siornaammut sanilliullugu qaffasinnerupput, 3. klassimi kisitsinermi minillugu.
Nalunnguarfiup Atuarfiani 7. klassini kalaallisut misilitsinnermi inernerit qaffasinnerupput. Kiisalu 3. Klassini qallunaatut misilitsinnermi angusat qaffasinnerupput. Tuluttut misilitsinnermi siorna angusat siornaammut sanilliutissagaanni qaffasinnerusut, nalunaarummi erserpoq.
Alloriarfimmi misilitsinnermut inernerit katinneri
Qeqqata Kommuniani meeqqat atuarfiinni atuartut alloriarfinni misilitsinnermi inernerisa affai nuna tamakkerlugu agguaqatigiisillugu appasinnerulaarput aammalu inernerisa affai nuna tamakkerlugu agguaqatigiisissagaanni qaffasinnerulaarlutik.
Nalunaarut naapertorlugu atuarfeqarfiit sisamat, Atuarfik Kilaaseeraq, Kangaamiut Atuarfia, Minngortuunnguup Atuarfia aammalu Nalunnguarfiup Atuarfia 3. klassini 7. Klassinilu atuartut kalaallisut alloriarfimmi misilitsinnermi inerneri pitsaanerupput nuna tamakkerlugu agguaqatigiisinnerani sanilliutissagaanni.
Pissaassusermut nalunaarut tamakkiisoq uani atuarsinnaavat.
