Pinerlunneq pinerluutaareersimaguni taamaallat suliarineqarsinnaanngilaq - aammali pinaveersaartinneqarsinnaavoq. Taamaattumik Kalaallit Nunaanni Politiit Qeqqata Kommunialu Kujataanisuulli isumaqatigiissusiornikuupput, tamatumani lokalråd aqqutigalugu kommunip nunaqarfiini illoqarfiinilu suliniutit pinerluttaalisitsisut assigiinngitsut pillugit suleqatigiittoqassalluni.
Isumaqatigiissutaasoq Qeqqata Kommuniani borgmesterip Malik Berthelsen aallartinneqarnissaa qilanaarivaa, oqaluttuarporlu:
”Politiit peqatigalugit lokalrådimi suleqatigiinnissatsinnut isumaqatigiissuteqarnerput immikkut nuannaarutigaarput, taamaalilluta ataatsimut unammillernartuutitsinnut ilaatigut pinerlunniarnermik, persuttaasarnermik unnuakkullu toqqissisimangittarnermut tunngatillugu qanimut oqaloqatigiissinnaaniassagatta. Suliniummut pissanganartumut tassunga aamma Qeqqata Kommuniani suliniutinut allanut suliarisatsinnut attuumalluartuusuusunut tunniussaqarnissatsinnut qilanaarpugut."
Sumiiffinni inuiaqatigiit pingaarutilimmik inissisimapput
Qeqqata Kommunianit Kalaallit Nunaannilu Politiinit sinniisuutitat sapaatit akunnerini kingullerni marlunni Kangerlussuarmi, Maniitsumi aamma Sisimiuniinnikuupput paasiniarlugu, najukanni pinerlunniartarnermik unammillernartut qanoq isikkoqarnersut, pinaveersaartitsinissamut periarfissat suunersut aammalu najukkani nukissat suut ikiuukkusunnersut.
Sisimiuni politeeqarfimmi ittuusoq lokalrådimilu siulittaasuusoq politikommisæri Karl Jørgen Lennert oqaluttuarpoq, suliniutit pinaveersaataasut sorliit iluatsissinnaanerannut ingammik kingulleq aalajangiisuusoq.
”Oqartussaqarfittut sorpassuit aallartissinnaavagut kisianni najukkani inuiaqatigiinnit ikiorneqanngikkaanni iluatsinnavianngillat. Inuit namminneq kajumissusillit, peqatigiiffiit, inuussutissarsiuteqarfiit, atuarfiit, paaqqinnittarfiillu sumiiffimmilu nukissat allat nammineq neqeroorutigisinnaasaminnik tunniussinissaat pisariaqartipparput. Imaassinnaavoq ilinniarfiit, pinnguaatinik pinnguarnermut cafèt, unnuamilu angalaartartut sorpassuillu - pinerluttunngornissaraluamiit allamik periarifssaqarnissaa pingaarneruvoq.
Meeqqat nerrivimmut guldkorn apuuppaat
Pinaveersaartitsinermi suliniarnermi sumiiffimmi inuiaqatigiit qitiulluinnartuummata, oqaloqatigiinnerni aallarnisaataasuni innuttaasut suliffeqarfiillu aamma oqaloqagatigiinnermut peqataatinneqarnikuupput. Nukiit taakku ilagivaat INI-minngaannersooq Birgithe Christiansen, najukkami Meeqqat oqartussaaqataanerannik suliniut aqqutigalugu meeqqanit inuusuttunillu pissarsiassanik katersisimasoq.
”Meeqqat inuusuttullu isumaat migisaallu tusarsimatinnagit taakku sinnerlugit inersimasuusugut suliniuteqannginnissarput pingaaruteqarpoq. Taamaattumik Meeqqat oqartussaaqataasut pinerlunniartarnermik qanoq misigisaqarnersut unammillernartullu aaqqinnissaanut sunik siunnersuutissaqarnersut aperivagut - tunniussassanillu ulikkaarput", Birgithe Christiansen oqarpoq nangillunilu:
”Susassaqartunut pingaarutilinnut Meeqqat oqartussaaqataasut nipaat ingerlatinneqarnissaanut ataatsimiinneq periarfissatsialassuuvoq, ilutigitillugulu migisimavara lokalrådit meeqqat tunniussaat guldtitut isigigaat.
Lokalrådi sapaatip akunnera 10-mi naapeqqissaaq, tassani najukkami inuiaqatigiit peqatigalugit aallarnisaataasumik sulinerit tunuliaqutaralugit Qeqqata Kommunianut ataatsimoorussamik periusissiamik aamma suliniummik pinaveersaataasumik tigussaasumik suliaqartoqassalluni. Tassunga atatillugu København Vestegns Politi lokalrådimik suliaqarnermik annertuumik misilittagaqartoq ikiuutissaaq.
Attaveqarfissaq
Tusagassiutitigut nalunaarummut apequtissaqaruit, tusagassiutinut aamma attaveqaqatigiinnermut suleqataasoq Nadia Ankerfelt Rasmussen nra020@politi.dk imaluunniit 567280 atorlugit attaveqarfiginissaanut tikilluaqqusaavutit.