Helene Broberg Berthelsen, ilinniarfeqarfinni aqutsinermi PD-usoq kiisalu Mitdlarak Lennert, issittumi inuiaqatigiilerinermi Ph.d.-usoq suleqatigalugit atuarfiit inerisarneqassapput.
Pingaarnertut pilersaarutavoq ataatsimoortumik atuarfinni pisortanut atuartitsisuusunullu neqeroorut siunertaralugu atuartut ilinninniartinnerisa ilinniartitsisullu tunniusimanerisa pitsaasumik angusaqarfiunissaa.
Meeqqat atuarfiini alloriarfiit, qallunaatut taallugu trinit assigiinngitsut ineriartortinnissaanut workshoppertinneqartassapput, tassani suleqatigiissutigineqassaaq atuarfinni ulluinnarni sakkuusinnaasut atorluarneqarnissaat, tassani atuarfiit kissaataat pisariaqartitaallu aallaavigineqarlutik.
Alloriarnerit pingasut
Inerisaanissamut alloriarnerit pingasut atuartut ilikkartinnissaanut aqutsineq qitiutinneqassaaq, soorlu siullertut ilinniartitsisunik aqutsinermi pikkorinnerulersitsinissaq. Tassani atuarfimmi aqutsisutut periarfissat inerisarneqarnissaat isumannaarniarneqassallutik.
Aappaattut ilinniartitsisut aamma siunnerfeqatigiillutik suleqatigiinnissaat anguniarneqassaaq, tassani ilinniartitsisoqatigiit atuartunut ataasiakkaanut ataatsimoortunullu erseqqissumik ilikkagassaannik suliaqassallutik.
Pingasuattut atuartut ilikkagassatit siunnerfiit erseqqarissut sulissutigineqassapput, soorlu atuartunut kajungilersitsinerit ilikkagassallu orniginarsarneqassallutik.
Atuarfiit pingasut ukkatarineqassapput
Qeqqata Kommuniani atuarfinni anginerni inerisaanissaq pissaaq, Atuarfik Kilaaseeqqami, Nalunnguarfiup Atuarfiani kiisalu Minngortuunnguup Atuarfiani.
Suleqatigiinneq ukioq ataaseq ingerlassaaq 30. juni 2024-ip tungaanut. Pisariaqartitsineq aallaavigalugu sivitsornissaanut aningaasanik ujarlertoqaqqissinnaalluni.