Aalajangiiffigisassatut siunnersuummi nunatsinni ujaraaqqanik qallersukkamik aqqusinermik sanaartortoqarsinnaanissaa Naalakkersuisut inatsisitigut qulakkeerinninnissaat aammalu Sisimiut Kangerlussuullu akornanni ujaraaqqanik qallersukkamik aqqusinniorneq Namminersorlutik Oqartussanit tamakkiisumik aningaasartuuteqarnissaanik Naalakkersuisut qulakkeerinnissaat Inatsisartuni oqaluuserineqarmat partiinit tamaniit tapersersorneqarpoq.
- Naak aningaasanik suli immikkoortitsisoqanngikkaluartoq nuannaarutigaara Inatsisartut Naalakkersuisullu nunatsinni siammasinnerusumik ineriartortitsinissaq pingaartimmassuk aammalu Sisimiut Kangerlussuullu akornganni aqqusineq takornariaqarnikkut ineriartortitsinissamut periarfissagissaarnera upperalugulu tapersersormassuk, tamanna pillugu qutsavigalugillu nersualaarusuppakka, borgmesteri Malik Berthelsen oqarpoq.
Iluaqutissarpassuit
Sisimiut Kangerlussuullu akornanni aqqusineq pillugu arlaannaannulluunniit attuumassuteqanngitsumik Namminersorlutik Oqatussaniit Oxford Global Project 2021-imi nalunaarusiortinneqarpoq. Nalunaarusiamilu ilaatigut inerniliunneqarpoq iluaqutissat aniingaasartuutillu imminnut naleqqiunnerat pitsaasumik angusaqarfiusinnaasut.
- Aqqusineq piviusunngortinneqarpat qularinngilara takornarissat piffissami sivisunerusumi nunatsinnut tikisittalernissaannut annertuumik iluaqutaassasoq, pissutigalugu aqqutaani neqeroorutigineqarsinnaasut amerlasuut ukioq kaajallallugu neqeroorutigineqarsinnaasussaammata. Taamaattumik nunatsinni sumiiffinni allani takusassaqqisut allat assigalugit aqqusinersuup siunissami nittarsaanneqarsinnaalernissaanut qilanaarlungalu isumalluarpunga, taamak borgmesteri Malik Berthelsen isumalluarlunilu nuannaaqisoq naggasiivoq.
Aqquserngup pilersinneqarneratigut misigisassarsiorluni takornariartitsinermut (adventure) annertuumik iluaqutaanissaa takornarialerisuniit aamma oqaatigineqartareerpoq.