Soorunami atuarfimmi pissutsit atuuttut tamatsinnut, ingammik atuartunut ilinniartitsisunullu ajuusaarnarlutillu ilungersunarput. Atuartut ilinniartitsisullu illersorneqannginnerinut IMAK-ip uparuaataanut atatillugu oqaatigineqassaaq, pineqartut illersorniarlugit atuarfik suleqatigalutigu assigiinngitsunik iliuuseqartarnikuugatta, soorlu atuarfiup avataani ininik atuartitsiviusussanik arlalinnik attartugaqarnikuuvugut, taamatullu siunissamut aaqqiissutaasinnaasunik maanna ujartuileruttoratta.
Atuarfik Kilaaseeqqami pissutsit pillugit siusinnerusukkut, kingullermik 2023-imi aasaanerani, IMAK-imit saaffiginnissummik tigusaqarnikuulluta uppernarsarsinnaavara.
2023-mi aasaanerani klassini ingutserisoqarlunilu silaannarissarfinnik ikkussuisoqarsimasoq aammalu inini silaannarmik misissuinermi oqoqannginneranik takutitsisoqartoq IMAK-imut akissuteqaatitsinni nassuiarparput.
Tamanna tunngavigalugu ukioq atuarfiusup 2023-2024 aallartinneranut atatillugu august 2023-mi atuartut ilinniartitsisullu atuarfimmut uterput.
Tamatuma kingorna atuarfimmi suli inuummarluttoqartarnera pillugu atuarfimmi aqutsisunit saaffigineqarpugut, tamannalu soorunami pimoorupparput.
Maniitsumi aqutsisut peqatigalugit aaqqiissutissatut siunnersuutissanik eqqartueqatigiileruttorpugut, tassani atuartut ilinniartitsisullu atuarfiup avataani alloriarfikkaartumik inissinneqarnissaat ukkatarineqarluni.
Atuarfiup tamakkiisumik nutarterneqarnissaanut aningaasaliissuteqartoqareerpoq ingutserinerlu 2024-p qiteqqunnerani aallartinneqassaaq 2026-milu naammassineqarnissaa naatsorsuutigineqarluni.
Tamakkiisumik nutarterinerup naammassineqarnissaata tungaanut, tassa atuarfimmut nutseqqinnissap tungaanut utaqqiisaasumik inissanik nassaarnissaq qulakkeerusupparput.
Oqaatigerusupparpullu nutaamik atuarfimmik sananissamut aningaasaateqarfimmiit aningaasaliinissamik neriorsuummik pigisaqartoqanngimmat.
Suliniutigineqartut pillugit angajoqqaat ilinniartitsisullu ataavartumik malinnaatinneqarput.