Kangerlussuarmi Mittarfik pillugu Danmarkimi Naalakkersuisunutnunatsinnilu Naalakkersuisunut ammasumik allagaq.

Qeqqata Kommuniani borgmesteritut Danmarkimi Naalakkersuisut Nunatsinnilu Naalakkersuisuni partiini siulittaasutut ilissinnut kaammattuutiginiarpara Kangerlussuarmi Mittarfik pillugu suliami sivitsortumi aaqqiissutissamik piaartumik nassaartoqassasoq.

Danmarkimi Naalakkersuisuusimasut Nunatsinnilu Naalakkersuisuusimasut 2018-19-imi piginneqatigiiffimmik Kalaallit Airportsimik pilersitsinikkut Nuummi Ilulissanilu mittarfissuarnik nutaanik sanaartornissamut aaqqiissutissanik sukkasuumik nassaarput.

Paarlattuanik Kangerlussuarmi Mittarfimmut siunissami aaqqiissutissamik nassaarnissaq taamak sukkatiginikuunngilaq. Nuummi mittarfimmik nutaamik ammaanissaq ukioq ataaseq sioqqutilaarlugu Kangerlussuarmi mittarfimmi sulisut, innuttaasut inuussutissarsiuteqartullu siunissaq sumik tunniussiumaarnersoq suli ilisimanngilaat.

Paasisaqarsinnaannginneq aalajangeruumaataarnerlu pilersaarusiupiluttoqarsorinninnissamik tunngaviliivoq. Kingullertigut nuna tamakkerlugu aviisimi AG-mi sapaatip akunnerani uani ilanngussami qulequtaq malillugu Kangerlussuaq nunanit allaneersunik timmisartuussinissaminut matoqqassasutut paasineqarluni nutaarsiassatigut allaaserineqarpoq.
Ilanngussami aammattaaq taaneqarpoq siunissami nunanit allanit timmisartuussisarnissaq ingerlatiinnarneqassappat ukiumut 53 mio. koruuninik akeqassasoq.

Maanna nalunngilarput Danskit naalakkersuisuisa Naalakkersuisullu nalussanngikkaat Kangerlussuup Mittarfia nunatsinni takinerpaallunilu isumannaannerpaasoq, nunallu tamalaat akornanni miffigineqarsinnaanissaminut suli periarfissaqassalluni.

Soorluttaaq ukiumut 53 mio. koruuninik akeqanngikkaluartumik nunanit allanit timmisartuussinissamut Kalaallit Nunaanni mittarfiit arlallit ingerlanneqartut amerlanerit nalugunanngikkaat.

Taamaattumik Kangerlussuarmi Mittarfik pillugu isumaqatigiissutit inissinneqarnissaat piffissanngorpoq, taamaalilluni nalornissuteqarneq peerneqarniassammat. Illersornissaqarfiup Kangerlussuarmiinnerani inuinnarnik nukittuumik inuiaqatigeeqarnissaa Danmarkimi Naalakkersuisunut pitsaaginnassaaq. Nunap takornariaqarnikkut orninneqartartup annersaata tullia ineriartortinneqarpat Naalakkersuisut takornariaqarnerup ineriartortinneqarnissaanut takorluugaannut aamma pitsaassaaq.

Qeqqata Kommunia unammillernartumik piaartumik aaqqiinissamut peqataasinnaakutsoorpoq. "Uagut peqataatinnata uagut pilluta eqqartuisoqassanngilaq". Najukkami inuiaqatigiinnut siunissaq pillugu paasissutissiisoqanngikkaangat ilaatigut suliffeqarfiutitsinnut sulisussanik paarinniinnarnissamik qammaanissamillu unammillernartitsisarpugut. Periarfissiisoqaraluartoq aningaasaliiniartoqaraluartorlu Kangerlussuarmi nunallu immikkoortuani aningaasaliiniartut akileraarutitigullu isertitassaagaluartut takkutinngitsoortartut ilaatigut misigisarparput.

Kangerlussuarmi Mittarfik atorumaneqanngippat Namminersorlutik Oqartussat kommunimut tunniussinnaavaat. Danmarkimimi mittarfiit kommunini pigineqartut Illersornissaqarfik suleqatigilluarlugu ingerlanneqarsinnaanerat takoreerparput, aamma nunat tamalaat akornanni timmisartuussinerit ilanngullugit.

Namminersorlutik Oqartussanit inniminneerneqarnikuusumi Kangerlussuarmut periarfissat tallimat pillugit nalunaarusiamik 2018-imeersumi Qeqqata Kommuniata atuarnikuuaa mittarfik 2.200 meterimik takitigisumik ingerlatsineq ingerlatsinikkut sinneqartoorutaassasoq aammalu mittarfimmik iluarsartuussinissamut Illersornissaqarfik akileerusummat, Kangerlussuarmi nunat tamalaat akornanni mittarfimmik ingerlatsineq atortuuteqarnerlu kommunimut aningaasaliissutaassaaq pitsaasoq.

Kangerlussuarmi Mittarfimmik kommunimut tunniussinissaq isumaqatigineqanngippat Kangerlussuarmi Mittarfik KAIR International A/S ataani inissinnissaa periarfissaasinnaavoq. Tassani siunissami Kalaallit Nunaanni mittarfiit 2000 meter sinnerlugu takissusillit aaqqissuussaanikkut inisissimapput. Kangerlussuup Mittarfiatuulli Naalagaaffimmit aamma Namminersorlutik Oqartussanit aammattaaq aningaasalersugaapput. Taamaatttumik KAIR International A/S pillugu Naalagaaffiup aamma Naalakkersuisut suleqatigiinnerannik malunnartitsisutut pitsaasumik sunneeqataasup qaffasissumillu aalajangiisinnaaassuseqartup Kangerlussuarmi Mitttarfik aamma ilagilersinnaagaat tulluartuuvoq.

Inussiarnersumik inuulluaqqusillunga

Malik Berthelsen
Borgmesteri