- Meeqqanut inuusuttunullu klubbit, sunngiffimmi sammisassat ataatsimoorfiillu toqqissisimanarnerutinniarlugit piffissamik, aningaasanik nukinillu atuiffigisigit.
NAKUUSA Meeqqat Isummersorfii ilaatigut taama oqariartuuteqarpoq. Angajoqqaat inersimasullu meeqqat sunngiffimmi sammisassaannut pimoorusseqataassasut tapersersuilluassasullu aamma ilaatigut oqariartuutigineqarpoq.
NAKUUSAmi Meeqqat Isummersorfiini ilaasortaq Winnie Ingemann peqatigalugu borgmesterilu atsioqatigiipput.
NAKUUSAp oqariartuutiminut tunniussineranut borgmesteri imatut akissuteqarpoq:
- Ilissituulli isumaqarpugut meerartagut inuusuttagullu nuannersumik meeraassagunik sunngiffimmi sammisassat ataatsimoorfiillu toqqissisimanartut pingaarutilerujussuusut. Taamaattumik aamma ukiumut aningaasarpassuit sunngiffimmi sammisassanut atortarpagut, soorlu meeqqat mikinerpaaniit timersortarfimmi pinnguartinneqarsinnaaneranniit inuusuttunut 25-it tikillugit klubbimik ornittagaqartinnerannut.
- Taakkua saniatigut inuusuttut peqataatinneqarnissaannik nammineerlusi oqariartuutersi anguniarlutigu. Timersoqatigiit Kattuffiannik Unicef-imillu suleqateqarluta meeqqat inuusuttullu sunngiffimmi sammisassanut tikilluaqqusaasutut misigisimanissaat anguniarlugu pikkorissaanernik aammalu inuusuttut namminneq peqataatillugit Game-mi playmakerit atorlutigit sunngiffimmi sammisassanik aaqqissuussinernut kommunimiit peqataanissarput isumaqarpunga pikkoriffigigipput. Isumaqarpungalu Timersoqatigiit Kattuffiallu suleqatigiilluta sunngiffimmi peqqinnartumik sammisaqarnermik nukittorsaasussamik atorfinitsitsisimanerput assorujussuaq torrallataallunilu iluaqutaasoq.
- Isumaqarpungalu angajoqqaat tapersersueqataanissaannik oqariartuutersi assorujussuaq pingaarutilerujussuusoq, qujanartumillu Sisimiut eqqarsaatigalugu isumaqarpunga ukiuni makkunani angajoqqaat meeqqamik sunngiffimmi sammisaannut assorujussuaq tapersersuillutillu peqataalluartut, taamaattumik angajoqqaat aamma nersualaarusuppakka.
- Inersimasunut sullissisunullu tusaaneqarnissassinnik, oqaloqatigineqarnissassinnik, akuutinneqarnissassinnillu oqariartuutissi pingaaruteqassusaat sulinitsinni eqqaamanissaat pingaartissavarput.
- Nersualaarusuppassilu nunatsinni meeraqatisi inuusuttoqatisilu sinnerlugit inuiaqatigiinnut tamanut oqariartuutissinnik apuussassinnut.
Innersuussutit Naalakkersuisut siulittaasuannut Múte B. Egedemut aamma tunniunneqarput. Borgmesterit allat aamma innersuussutinik tunineqarput.
