Meeqqat pillugit angalasartut siorna ukioq mannalu sisimiuniipput, tassani meeqqat inuusuttullu 18-it ataallugit ukiullit kinguaassiuutitigut innarlerneqarsimasunik taamaattoqarsimaneranilluunniit pasitsaaffigineqarsimasunik, kiisalu allanut kinguaassiuutitigut ernumanartumik kanngunarsaasumilluunniit pissusilersortunik qulaajaanissamut katsorsaanissamullu Meeqqat pillugit angalasartut siunertaraat.
Paasisat imaannaanngitsut
Qulaajaanermi katsorsaanermilu paasisat imaannaanngitsuusut Meeqqat pillugit angalasut ukioq manna nalunaarusiaanni paarsinarsivoq.
Meeqqat inuusuttullu katsorsartinnissaanut innersuunneqartut katillugit 38-iusuni meeqqanik oqaloqatiginninnerit naammassineqartut 17-upput. Innersuunneqarsimasut sinneri 17-it oqaloqatigineqarnissaat anguniarlugu sisimunut angalasoqaqqinnikuuvoq.
Naak Ilaqutariinnik Kiffartuussiviup suleqatigiinera ingerlalluaraluartoq paasineqarpoq meeqqanik inuusuttunillu sakkortuumik misigisaqarsimasunik, soorlu PTSD-ertutut taaneqarsinnaasunik tigusaqartartut. Suliat tamakku tarnip pissusiinik ilisimasalinnit meeqqani sakkortuunik misigisaqarsimasunik ilisimasaqarluartunit tarnillu pissusinnik ilisimasalimmit imaajartarnissamut qanimut suleqateqartumit taamaallaat isumagineqartartussaagaluartut, Meqqat pillugit angalasut nalunaarummini allapput.
Meeqqat pillugit angalasartut isumaqarput Ilaqutariinnik Kiffartuussivimmi tarnip pissusiinik ilisimasallit minnerpaamik qaammammut ataasiarlutik tarnip pissusiinik ilisimasalimmit imaajartinneqartassasut. Meeqqallu sakkortuumik misigisaqartartut ikiorneqarnissaannut pikkorissarnissamut neqeroorfigineqartarnissaat pingaaruteqartoq ilanngullugu allaaseraat.
Meeqqat pillugit angalasartut naliliinerani erserportaaq, Sisimiuni Atugarissaarnermut immikkoortortamik qanimut suleqatigiinnermik ingerlatsisoqarsimanngitsoq. Patsisaasut ilagaat oqartussat immikkoortortaqarfiani meeqqanut tunngasunik sulianik arlaqaqisunik artukkerneqarsimanerat. Tamanna unammillernartuusoq, immikkoortortaniillu allanit nalunaarutiginninnissamut nalornisoqartartoq, oqaatigineqarluni malitseqartinnissaannut piffissaqartoqarsinnaanera ilimagineqanngimmat suliallu politiinut suliakkiunneqarnissaa allatigulluunniit qisuarfigineqarnissaa ilimagineqarneq ajortoq nalunaarusiami allassimavoq.
Nalunaarusiami aamma allassimavoq sisimiuni politiit suleqatigalugit Meeqqat pillugit angalasartut najukkami inuusuttunit persuttaasarnerup annertusiartornera pillugu isumasiueqatigiinnermi meeqqat akornanni akissarsiutigalugu atortittarnerit ilisimaneqalersimasut.
Suleqatigiinneq nukittoqarsarneqartariaqartoq
Meeqqat pillugit angalasut nalunaarusiaat kommunalbestyrelsimut marlunngornermi decembarip ulluisa 19-anni saqqummiunneqarpoq. Saqqummiunneqarnerani Meeqqat pillugit angalasut innersuussuteqarput. Innersuussutigineqarpoq suleqatigiit tamarmik akornanni suleqatigiinneq nukittorsarneqassasoq. Suleqatigiinneerup nukittorsarneqarnissaanut anguniarneqassalluni meeqqat inuusuttullu kinguaassiuutitigut qaangiivigisarnerisa atornerlunneqartarnerisalu unitsinneqarnissaat. Kiisalu meeqqat inuusuttullu timikkut tarnikkullu persuttagaasarnerat unitsinneqarnissaat piumasarineqarluni.
Kommunalbestyrelsi ataatsimiinnermini ilaatigut oqaatigineqarpoq Qeqqata Kommuniata kinguaassiuutitigut atornerluinerit akuersaanngilluinnaraat, Meeqqat pillugit angalasut innersuussutaat piaartumik sulissutigineqassasoq ataatsimiinnermi akuersissutigineqarpoq.
Allaffeqarfik suleriaqqinnissamut suliaqassasoq innersuussutigineqarpoq, soorlu akimortumik suleqatigiinnerup annertusarneqarnissaanut angajoqqaat atuarfeqarfiit, atuarfinni siunnersortit, ilaqutariinnut kiffartuussiviit, pinaveersaatitsut, meeqqerivinni sulisut ornittakkallu suleqatigalugit.
Kommunalbestyrelsip ataatsimiinnerani naggataatigut ilanngullugu oqaatigineqarpoq meeqqat toqqissisimasunik juullisiornissaannik kissaallugit.
Attavissaq:
Atugarissaarnermut ataatsimiititaliami siulittaasoq: Juliane Enoksen, jule@qeqqata.gl imaluunniit info@qeqqata.gl