Ukiuunerani 2024-mi Kangerlussuup eqqaani ukiuunerani umimmattassiissutit piffissaliussarlu pillugit Aalisarnermut piniarnermullu naalakkersuisup aalajangiinera ulloq 12. februar 2024 nalunaarutigineqartoq innersuussutigalugu.
Qeqqata Kommunianit matumuuna nalunaarutigissavarput isumaqaratta piniarnerup aallartiffissaa nalunaarutigineqartoq siusippallaartoq piumasaralugulu piniarnissamik piffissaliussaq sivitsorneqaratariaqartoq. Piniartut kommunilu matumani aalajangiinermi periarfissinneqanngillat piareersarnissamut aamma pisassiisoqartillugu pisassiissutinik agguaanissaq sioqqullugu malittarisassat malillugit tusarniaaqqaarluni agguaaneq kommunimit ingerlanneqartarpoq, ataatsimiititaliamit aalajangiiffigineqarluni. Taamaattumik piniarnerup aallartinnissaanut ullunik marluinnarnik periarfissiineq piviusorsiunngimmat ilungersortumik piumasarivarput piffissaliunneqartut sivitsorneqartariaqartut.
Qeqqata Komuniata matumuuna ilanngullugu piumasarivaa umimmannik kisitsinermi paasissutissat inerniliussallu massakkut takorusullugit tassunga ilanngullugu nuna kisitsiffiusoq pillugu (nunap ilaani sumi kisitsineq) ingerlanneqarsimanersoq paaserusullugu.
Qeqqata Kommuniata aamma paaseruppaa tammajuitsussarsiorlunI piniartitsinissamut pisassiisoqarnissaa pilersaarutaanersoq?
./. Ilanngullugit nassiunneqarput pisassiissutinik naalakkersuisup aalajangiinera pillugu Maniitsumi aamma Sisimiuni aalisartut piniartullu peqatigiiffiisa oqaaseqaataat kommunimit tiguneqartut.
Tamatsinnut naammaginartumik paaseqatigiittoqarnissaa Naalakkersuisumit tigulluarneqarnissaa neriuutigalutigu, Naalakkersuisoq qinnuvigissavarput ullumikkut piaartumik akissuteqaqqullugu suliap piaartumik ingerlaqqinnissaa pisariaqarluinnarmat.
Inussiarnersumik inuulluaqqusilluta
Qeqqata Kommunia sinnerlugu
Aqqalu Skifte Malik Berthelsen
Ataatsimiititaliami siulittaasoq Borgmester
Allagaqaat uani takuuk