Maniitsup atuarfia Atuarfik Kilaaseeraq illorsua oqummik eqqugaalluni atuartut ilinniartitsisullu sumiiffinnut assigiinngitsunut aggulullugit inissinneqartariaqarsimapput, taamaakkaluartoq ilinniartitsisut aqutsisullu nikallujaallutik pitsaanerpaammik angusaqarusunneq pingaartillugu meeqqat anguniagassaat ilikkagassaallu sulissutigaat.
Atuarfeqarfinnik ilisimasaqartut suleqatigalugit atuarfiup ilinniartitsisullu pisariaqartitaat aallaavigalugit nalilersuisoqarpoq.
- Ilinniartitsisut illuni assigiinngitsuni immikkooraluarlutik atuartut qitiutillugit ukiumut ilikkagassatut anguniagassat aallaavigalugit ilinniartitsisut pimoorussilluinnarlutik aallartisarput. Taakkulu nersortariaqarput tamaviaarlutik atuartut angusassaat qulakkeerniarsarallugit sulipput, Midtlarak Lennert oqarpoq.
Helene Broberg Berthelsen, ilinniarfeqarfinni aqutsinermi PD-usoq kiisalu Mitdlarak Lennert, issittumi inuiaqatigiilerinermi Ph.d.-usoq suleqatigalugit Qeqqata Kommuniani atuarfiit inerisarneqarnissaat siorna juunip qaammataani atsioqatigiittoqarpoq.
- Aqutsisut sulilluartut sutigut tamatigut atuartunik angusaqartitsilluarusuttut, sulinerminni ataqqinnilluartut tunniusimasullu, suliassarititaassut suliffiup iluani ersarissarnissaanut nukissaqarluarput. Taakkulu atuarfiup inerisartuarnissaanut siunnerfeqarluartuusut assut malunnarpoq, Helene Broberg Berthelsen oqarpoq.
Fagini ataasiakkaani ukiumut anguniagassat ersarinnerusut pilersinneqarput, alloriarfinni ataatsimoorussamik pilersaarusioqatigiittarneq iluatsilluartoq pilersinneqarpoq, kiisalu pikkoriffiit aallaavigalugit suleqatigiinneq pitsaanerusoq anguniarneqalersoq Helene aamma Mitdlarak Atuarfik Kilaaseeqqamiinerminni ilaatigut inerisaanerminni sakkussanik pilersitseqataaffigisaat ilinniartitsisunit tigulluarneqartoq ilanngullugu oqaatigaat.