Saviatsit masattut anartarfinnut igiinarneqartartut Sisimiuni ajornartorsiutaapput, taakku pumpeqarfinni katersuullutik erngup kuuffinni ingerlaarneranut milittoortitsilertarmata suliariuminaattorujussuusinnaasarput.
- Ajornartorsiorfigisartakkavut tassaanerusarput pumpeqarfinni vådservietit anartarfinnut kuutsinneqartartut, ulluni makkunani akiani pumpeqarfik vådservietinik kuutitsiviungaatiarsimalluni salinneqarpoq. Innuttaasunut kaammattuutigerusunnarpoq vådservietinik atuisimatillutik anartarfinnut kuutillugit igittannginnissaat, kuuffissuimmi pumpeqarfii tamakkununnga naatsorsuussaanngillat, milittoortitsigaangatalu ammarsaatinik aserorterneqarsinnaaneq ajorlutik, Sisimiuni aqqusinilerisut formandiat Morten Siegstad oqarpoq.
Kuuffiit sumiiffinni assigiinngitsuniittut qerisoorsimannginnersut qulakkeerniarlugit misissuinerit ingerlasarput, ilaatigullu kuuffinni atuisut ikippallaarnerisa kingunerisaannik imeq qerilluni milittoortitsisinnaasarpoq. Qerisoortullu piffissarujussuarmik atuiffigineqartarnerat ukiuunerani takornartaanngilaq.
- Imeq kuuttoq annikippallaarluni aqqutaa qerisoortarpoq, pingaartumik illut inukinnerusut kuutitsinikinnerusullu qerisooqqajaanerusarlutik, taakku aamma kuuffinni assigiinngitsuni milittoortitsinerni peqqutaakkajuttarput. Ilaqartarpulli aamma igaat sinnikuinik anartarfimmut kuersaasarsimasunik kuuffinnilu taakku orsuisa peernissaat piuminaatsorujussuussarluni, taamaattullu issittumi suliaquterujussuusarput Morten Siegstad oqarpoq.
Sapaatip akunneranut kuuffissuit qulit 15-illu akornanni ammarsarneqartarput, ilaallu sapaatip akunneranut marloriarlugit ammarsarneqartariaqartarput.