Sinneqartoornermut ilaatigut pissutaavoq innuttaasut akileraarutaasa (indkomstskat) aammalu suliffeqarfiit iluanaarutaasa akileraarutaannik naatsorsuutigisamiit isertitaqarnerusimanerput. 922mio. kr.-inik isertitaqarnitsigut Qeqqata kommunia oqaluttuarisaanermi aatsaat siullemeertumik 900mio. kr.-inik amerlanerusunik isertitaqarpoq, tassa missingersuutaasuniit 865mio. kr.-iniit, 57mio. kr.-inik amerlanerusunik. Ukiup siulianut sanilliullugit isertitat 41.7mio. kr.-inik qaffariarsimapput. Tamannalu ilaatigut pissuteqarpoq sulisinnaasut amerlanerpaat qujanaqisumik sulinerannik. Tassami 2023-imi suliffissarsiortut agguaqatigiissillugu 2022-imut sanilliullugu qaammammut 70-inik ikinnerusimapput.
Kommuni ataatsimut tamaat isigalugu sanaartorneq qujanartumik aamma ingerlalluarpoq, kommunimilu sanaartornermut 80mio. kr. atorneqarsimapput, ukiup siuliani 66mio. kr. atorneqarsimasut.
Naatsorsuutigisatsinniit isertitaqarnerusimanerput nuannaarutigigaluarlutigu ingerlatsinermut aningaasartuutigut aamma qaffakkiartornerat pissutigalugit sukannersumik ingerlatsinissaq mianersornissarlu suli pisariaqarput. Pissutigalugu immikkoortortaqarfiit ilaanni aningaasartuutit ukiup siulianut sanilliullugit appariarsimagaluartut, takusinnaavarput atugarissaarnermut immikkoortortaqarfimmi aningaasartuutit ukiup ataatsip ingerlaneriinnaani 31mio. kr.-inik qaffariaateqarsimasut.
Atugarissaarnermut immikkoortortaqarfimmi aningaasartuutit inunnik isumaginninnermut tunngassuteqartut annikillisaaffiginissaat ajornakusoortarpoq, pissutigalugu pissutsit assigiinngitsut siumut naatsorsorneqarsinnaanngitsut pinngitsooranilu aningaasaliiffigineqartariaqartut tassani pineqartarmata.
Ingerlatsinermut aningaasartuutissatut missingersuutaaqqaartuniit 795mio. kr.-iniit immikkut aningaasaliissutit ilanngullugit (tillægsbevilling) 823 mio. kr.-inik ingerlatsinermut aningaasartuuteqarsimavugut, tassa missingersuutaaqqaartuniit 28mio. kr.-inik qaffasinnerusumik. Kommunip karsiani aningaasat uninngasuutigineqartut eqqarsaatigalugit kommuni akiliisinnaassutsikkut pitsaasumik inissisimavoq aammalu attartukkanut akiitsoqarani.
Paasissutissat annertunerusut kommunip nittartagaani, ”Ukiumut nalunaarusiaq” iserfigalugu atuarneqarsinnaapput.