Sara ukiorpassuarni uummateqarfini meeqqeriviit sullittuarsimavai, 1994-imi Maniitsup Kommuniani kingornalu kommunit kattunnerisa kingorna Qeqqata Kommuniani atorfiit meeqqeriveqarnermut inulerinermullu tunngasuni assigiinngitsuni sulisimavoq. Marsip aallaqqaataat 2021-mi Meeqqeriviit pisortaatut toqussi tikillugu sulilluni.
Maniitsumi nunaqarfinnilu meeqqeriviit katillugit arfineq marluusut, meeqqanik angajoqqaanillu atuisoqarneri, sulisoqarneri, aningaasaqarneri qullersanillu qanimut suleqateqarneq Sarap ulluinnarni akisussaaffigai. Ilaatigut nunarput tamaat isigalugu inatsisitigut inatsisissanik atuutitsinissaminut suliniuteqarluni siunnersuuteqartarsimalluni.
Meeqqat sullinneqarnissaat atualinnginnerminni piginnaasaqarnermikkut qaffasissumik meeqqerivimmiinnerminni angusarissaarlutik atuarfimmut ikaarsaarnissaat Sarap pingaartitaasa ilagaat, tamannalu peqqutigalugu atualertussat immikkut meeqqeriveqalerneri piviusunngorsimalluni.
- Sara suleqatigalugu nuannersuuvoq, suliffimminut tunniusimagami naatsorsuutigineqartuaannarsinnaavoq. Ilisimalikkani pillugit suleqatiminik inerisaarusuttuuvoq, meeqqat sullitat suleqatigiit angajoqqaanullu anguniagaqarnermini ima oqartarpoq: ”Iligiippugut sullissinitsinni”
Sara meeqqeriviit pillugit sulinitsinni qaqugumulluunniit eqqaaneqarnera ataqqiuassavarput, Qeqqata Kommuniani meeqqeriviit tamarmik sinnerlugit meeqqeriviit allaffiani suleqatai taama allapput.
Sara meeqqanut malunnaatsilimmik suliniuteqartarneranut, aamma allannguiniarnermik suliniuteqartarneranut ilaatigut suliniutinut ingerlalluartitsisarnermini Qeqqata Kommunianiit akissarsitsinneqarnikuuvoq, taammatullu aamma 2023-imi Qeqqata Kommuniani sulisutsialattut toqqagaannikuulluni.
Sarap qimataraa uini Ole Rosing, qatanngutini taakkualu kinguaavi, ilaquttanilu qanigisani.