Qeqqata Kommuniata Borgmesteria Kunngikkut tikilluaqquai

Ataqqinartorsuaq Kunngi Frederik nulialu Ataqqinartorsuaq Dronning Mary, qitornasilu nukarliit marlulissat, Minik aamma Ivalo naalagaaffimmi qullersatut siullermeertumik nunatsinni angalanissinni Sisimiunut tikilluakutsooritsi.

Aallarniutigalugu ernissi angajulliup, Kunngissap Christianip ilinniarnertuunngornerani pilluangaaritsi.
Qularinngilara angajoqqaat allat assigalugit tamanna angajoqqaatut tulluusimaarutigigissi.

Asasarput Kunngi Frederik, nunatsinni ukiorpassuarni sungiusimasatsituut “kunngissamik” taasaratsigit, maanna Kunngitut taaguuteqalernerit sungiunniartariaqassavarput, tassami ilaatigut suli “Kunngissamik” taaneqartarnerit tusartarpara.

Frederik, anaanavit ukiortaami oqalugiarnermini Dronningiunerminit tunuarniarluni oqaatigimmagu, tamanna nunatsinniit aamma assut tupaallaatigisimavarput.

Januaarillu 14-anni tupinnaannartumik inupparujussuarnit malinnaavigineqartumik persuarsiornartumillu Kunnginngortinneqaravit isigisaq killitsinnarlunilu tupinnangaarmat, ilaquttannut suleqatinnullu oqarpunga qujanaqaaq anaanaata suli peqqilluni tamanna misigimmagu.

Takorloorsinnavara anaanavit tamanna killitsissutigisimassagaa. Qanorli aanagigaluavit qanittumik atassuteqarfigisimasavit, Dronning Ingrid-ip, ataatagigaluavillu Prins Henriup tamanna aamma misigisimagaluaruniuk qanormitaavami tulluusimaarutigitigisimassagaluarpaatsit.

Illillu Dronning Mary, Namminersorlutik Oqartussat nersornaasiuttagaannik guldiusumik nersornaaserneqarninni Sisimiuni innuttaasut sinnerlugit pilluaqquakkit, nersualaarlutillu Mary fonden aqqutigalugu, inuiaqatigiinni pingaaruteqaqisumik inunnullu pineqartunut isumalerujussuarmik uummateqarfigalugit suliniuteqarnerit pillugu.

Nuannaarutigalugulu oqaatigissavara qujanartumik Sisimiuni atuartuutigut nammineerlutik meeqqat akornganni qinngasaaruttarnerup unitsinneqarnissaata aamma kikkut tamarmik ataatsimoorfinnut tikkilluaqqusaassutut misigisimanissaannik anguniagaqatigiinniarlutik siornaakkunni isumaqatigiissuteqarmata.

Isumaqarpunga meerartatta nammineq oqariartuutaannut uagut angajoqqaat inersimasullu tamatta ileqqorissaarnissamut maligassiuisussatut pingaarnerpaamik inissisimasugut.

Dronning Mary, nalunngisatsituut uiit Frederik kalaallinit assorujussuaq nuannarineqarlunilu asaneqarpoq. Tamannalu tunngavigalugu tupinnanngitsumik kalaallit illit ukuaartorpaatsit, qularinngilaralu oqaaseq ”ukuarput”, illit pillutit siunissami tusartuartarumaaripput. Imaluunniit kalaallit nuannersumik oqartariaasiat malillugu, ”ajoranimi taanna ukuarput”.
Frederik, nalunngilarput timersornermik aamma timersuutini assigiinngitsuni isorartuumik imminullu unammillernartuni ingerlanneqartartuni peqataanissannik soqutigisaqartuusutit, soorlu 2016-imi ACR-imi peqataaninni aamma tamanna takugipput. Eqqaamavarpullu 160km. ingerlaareerlugit tikikkavit innutaasuniit nuannersumik utoqqasaallu ilaasa qutsaserlutit tikilluaqqummatsit.

Taamaattumik inuilaami nipaatsumiinnissamik eqqissisimaarnissamilluunniit pisariaqartitsileraangavit kommunitsinnut tikilluaqqusaavutit. Tassami Sisimiut Kangerlussuullu akornganni nunatarujussuatsinni 160 km-isut isorartutigisumi periarfissarpassuit, Sisimiunilu pilluarluta inuunitsinnut pissutaaqataasut ilaat, soorlu, aasami ukiumiluunniit cykkilinik, pisunnermik, sisorarnermik, ATV-inik Snescooteriniluunniit, alutornarluinnartumik avatangiiseqarluni aneerfissarujussuaq pigivarput.
Imaluunniit aliannaarlutit qimusseqqikkusuleruit Sisimiuniit Kangerlussuarmut upernaakkut qimussernissannut periarfissaqarputit, qimussertalernikuuvunga, attavigiinnassavarma.

Kunngi Frederik, Dronningi Mary-lu ullormut takutitassatsinnut qilanaarpugut, neriuppugullu Sisimiuniinnissinni nuannisarumaartusi.
Isumaqarpungalu aqagumut qilanaarnissassinnut pissutissaqarluartusi. Tassami aqagu angalaffigisassarsi tupinnaannartumik alutornarlunilu kusanarluinnartuuvoq, neriuppungalu silagissiorumaartusi, nuannisarisilu.

Maanilu najuuttusi Kunngikkut siullermeertumik Kunngisut Dronningisullu Sisimiunut tikeraaqqaarneranni tikilluaqqullutigit, pingasoriarluta hurraarutigisit. 1,2,3.